Dawa u Bah Adelbert ban pynshitom ia ki Kompani ba kamai beain da ar shaka

U MLA ka VPP uba la shah sospon na North Shillong constituency u Bah Adelbert Nongrum hynne ka sngi ula phah tuklar ha u Symbud Myntri Rangbah ba khmih ia ka tnat Transport u Bah Sniawbhalang Dhar halor ka jingkynnoh ba don ki Company ki bym pat don Licence kiba treikam kum ki Aggregator ban pyniaid taxi bad ar shaka kaba long beain katkum ka Meghalaya Taxi Aggregator Operational Rules, 2020 bad halor ka jingslem ka Sorkar ban ai jingbit ia ka Jets 24×7 ban ioh jingbit ban sdang kamai taxi da ki arshaka.Haba kren bad shaki lad pathai khubor u Bah Adelbert ula ong, wat la ka Jets 24×7 ka la pyndep ïa baroh ki kyndon ba donkam, hynrei haduh mynta ka dang mad jingeh namar ka Sorkar kam pat ai jingbit ban ioh sdang kamai taxi da ki arshaka.

Ka Jets 24×7 ka la ap mynta la palat 11 bnai ban ai jingmynjur na ka sorkar hynrei haduh mynta ka sorkar kam pat phah kyrwoh, la ka Company ka la ioh ne em ka jingmynjur ban sdang kamai.”Nga sngewkhia jur ym tang ia ka jingbym leh eiei pyrshah ia ki Company ba pyniaid taxi kamai daki arshaka hynrei ruh ia ka rukom bym ryntih bad bym iahap ka rukom pyniaid ka Regional Transport Authority (RTA). Ka Jets 24×7 ka la pyndep ia baroh ki kyndon ba donkam, hynrei kam pat ioh ka jingmynjur ban sdang kamai la palat 11 bnai. Kane ka jingleh ka tnat Transport ka long ka bym lah ban pdiang” la ong u Bah Adelbert.

U Bah Adelbert u la ther tyngeh ruh ia ka tnat halor ka jingleh bym suidniew ka tnat iaki Company bym pat ioh License ban kamai hapoh ka Jylla kaba pynkhein ia ka Meghalaya Taxi Aggregator Operational Rules, 2020.”Balei ka tnat ka ailad ia kum kine ki jingpynkhein kiba paw pyrthei katba ka pynslem ban ai ka jingmynjur iaka Company trai Jylla” ula ong bad ula buh jingkylli daka ba ong “kane kan pynshlur ia ki kam beain bad ka wanrah ia ki jingma kiba shisha ia ki nongleit nongwan.””Kane ka jingpynslem ym tang bala pynduh mynsiem ia ka jingseng kam seng jam kaba hok hynrei ka buh ruh ha ka jingma ia ka jingim jong kiba bun ki samla bym don kam don jam kiba la aiti ha kane ka rynsan da ka jingsngewbha” u la bynrap.U MLA u la ban jur ba ka kamram jong ka Sorkar ka dei ban kyntiew bad kyrshan ia ka kam seng kam seng jam kaba hok, ym ban pynduh mynsiem ia ka lyngba ka jingshim rai kaba slem bad kaba khlem iahap.”Nga la thrang ban iohi ia ka jingshim khia jong phi mardor na ka bynta ka jingbha jingmiat jong ki samla jong ngi namar ba ka Sorkar ka dei ban long kaba ai mynsiem ym ban pynduh mynsiem” ula ong.Katkum ka jingong jong u, ka Sorkar ka dei ban phah ïa ka khubor kaba shai ba ka jingsynshar kaba pynshong nongrim ha ki kyndon bad ka rukom treikam kaba hok bad kaba khuid ka dang don.