Pyllait ka sorkar T.79.5 klur sha GHADC ban siew tulop nongtrei 12 bnai

Ka kynhun Myntri sorkar hynne ka sngi ka la mynjur ban pyllait T.79.5 klur ka pisa sha ka Garo Hills Autonomous District Council (GHADC) na bynta ban siew tulop ia ki nongtrei ka GHADC. Na ka T.79.5 klur, T.11 klur ka dei kaba ka pisa jong ka GHADC ba sahram ha ka Sorkar bad T.68.5 klur ka dei ka pisa ba ai lypa (Advance) na ka bhah marpoh khyndew ba ka GHADC ka dei ban ioh man u snem. Haba pynbna ïa kane u Myntri Rangbah ka Jylla u Conrad K Sangma ula ïathuh ka pisa ba kot T.79.5 klur la phah sha ka Escrow Account jong ka GHADC ba dei ka Bank Account ban pyndonkam tang ban siew thik ia ka tulop jong ki nongtrei ka GHADC.

U Conrad ula ïathuh lyngba ka jingpyllait ka sorkar ia ka pisa ba T.79.5 klur, ka GHADC mynta kan lah ban siew ia ka tulop jong ki nongtrei na ka bynta 12 bnai. “Kane ka pisa ba ka sorkar ka phah sha ka GHADC ka dei hi ka pisa jong ka District Council hynrei ka Sorkar ka siew tulop ia ka pisa ba ka dei ban ioh man u snem, hynrei ka Sorkar ka shu buh kyndon ba ia ka pisa dei ban phah sha ka Escrow Account bad dei ban don u Principal Secretary ban khmih ia ka Bank Account khnang ban pynthikna ba ïa kane ka pisa dei ban pyndonkam thik tang ban siew tulop ia ki nongtrei” la ong u Conrad.

Haba pynshai halor ka jingdonkam ban thung da u Principal Secretary ban khmih ia ka Escrow Account, u Myntri Rangbah ula ong “Ym don mano mano na ka Sorkar Jylla ban tuklar ia ka Bank Account hynrei tang ki ophisar ka GHADC bad ka jingdonlang u Principal Secretary ka dei thik ban pynthikna ba ka GHADC ka pyndonkam ia ka pisa tang ban siew tulop ia ki Nongtrei, ym ban pyndonkam shawei pat”. U Conrad ula kyntu ia ka GHADC bad ïa kiwei ki District Council hapoh ka Jylla ba ki donkam ban wanrah ka jingkylla ia ka rukom treikam khamtam halor ka jingpyndonkam hok ia ka pisa jong ki District Council. “Ka Sorkar ka khmih lynti ba ka GHADC bad kiwei ruh ki District Council ki dei ban pynduna ka jingdon ki Nongtrei, ban pynioh bun ka jinglum khajna ban thaw ki Service Rule khnang ban nym pynsyrwa kai ia ka pla tyngka bad ki nongtrei kin ioh tulop man u bnai” ula ong.