Ia kynduh u MR bad ki nongialam niam, shnong ban tehlakam ia ki kam sniew

U Myntri Rangbah ka jylla u Conrad K. Sangma hynne ka sngi Palei ula lum ia ka jingialang bad kiba donbynta lang ha ka kam ne Stakeholders’ ha Meghalaya Secretariat ban iatai sani halor ki jingjia ki kam sniew ia ki khynnah bad ki longkmie hapoh ka jylla. Ha kane ka jingialang la shim bynta ki nongialam niam bapher, ki sengbhalang ki nongialam shnong ban ia phylliew jingmut bad ban ai jingmut ban pynkhlain ia ki lad ban ai jingiada bad jingshngain. Haba iakren bad ki nongthoh khubor, u Myntri Rangbah ula ong ba ka sorkar ka la shimkhia ia ki jingjia dang shen wat la don ka jinghiar jong ki jingjia. “Ka jingjia khah khah ha ki khyndiat sngi bad ki bnai ba la dep ka dei ka mat kaba ngi sngewkhia bha. Ngi kwah ban pynthikna ban shim ia ki sienjam ban pynduna ia kine ki jingjia bad peit kumno ka imlang sahlang, ki Rangbah Shnong, ki kynhun bad ka sorkar ka lah ban iatreilang ban pynurlong ia katei ka jingthmu.

U Conrad Sangma ula pyntip ba ki nongiashim bynta ki la ai jingmut kynthup ia ka jingdonkam ban pynbun ia ki counseling center bad ki counselor ba tbit ban kyrshan ia ki khynnah bad samla. “Ngi lah shim ia kine ki jingai jingmut bad ngin sa leh ruh ia kaba donkam” ula ong. Ula bynrap ba ki nongiashimbynta kila ai jingmut ban pynlong ia jingpynsngewthuh paidbah ne Awareness kaba heh bad ki jingpathai khubor ban pynsngewthuh ia ki khynnah halor ki mat kiba iadei bad ka imlang sahlang bad ban don ia ka jinglong kaba don akor. Ula ong, ba ka sorkar shen kan sa sdang noh ia kitei ki prokram ha ki kyrdan ki bapher bapher. Ban pynkhlain ia ka jingai jingshngain ia ki paidbah, u Myntri Rangbah ula pynbna ba ka jingpyndait ia ki kor CCTV ha ki shnong kiba kongsan kadei kaba dang iaid shakhmat. “Sawpew phra tylli ki shnong kila dep ai jingtip bad ka jingpyntreikam kala sdang. 7 tylli la dep ban pyndep bad sa 40 tylli un sa kynthup lang ha ki 60 sngi. Kin sa don shuh shuh ki shnong kiban sa shimkhia lada donkam” ong u Sangma.

U Myntri Rangbah ula ong ruh ba ka jingpynbha ia ki post elektrik da ka jingiatreilang bad ki shnong kadei kaba la shimkhia bad kaba la pdiang ban kyntiew ia ka jingshngai m ha ka por mynmiet. Ula pynpaw ia ka jingsngewkhia halor ka jingsaphriang ia ki jingtip ki bym pat thikna lyngba ka rynsan Social Media, u Sangma ula kyntu ia ki nongshong shnong ba kin pynpaw ne ai kano kano ka jingpynsngew mardor ia ki jingring dur ne jingthoh kiba la saphriang ha ki rynsan Online.   “Bun ki por, ki khubor ki bym pat thikna kila saphriang kloi bad ialam sha ka jingialum ia ki  paidbah ne jingkhuid u paidbah. Nga kyntu ia ki nongshong shnong ba kidei ban pynshisha shwa ia ki jingtip hashwa ba kin pynpaw ne leh eiei bad ban shaniah ha ki nongialam shnong bad ki pulit ban shimkhia thikna ia katei ka mat da ka jingkitkhlieh” ula ong.