Shongshit ka rakhe Diwali ki riewngeit Hindu

Ki riewngeit Hindu mynta ka sngi ki la lehkmen ia ka jingrakhe lehniam ba shisien shisnem ka Diwali kaba la ju tip ruh kum ka jinglehkmen ding jingshai.La iohi ba ki riew ngeit Hindu ki la rakhe ia kane ka Diwali da kaba pynieng ia ki lakait ha khmat ki dukan, ki iing sah, ryngkat ki ding ban pynthaba bad ai jingshai, kum ka jingkmen ba ka jingshisha ka jop ia kaba sniew.

Ha kane ka jylla, la iohi ba kane ka jingrakhe kam dei ba ka pynshongshit tang ia ki riewngeit Hindu hynrei wat kiwei ki bym dei na ka jingngeit Hindu ruh, ki la iashim bynta shitrhem ban thang bomb pataka, haduh ba ka sor Shillong ka la sakhi ia ka jingbthei ki bom ba bun jait bad bun rong.Ha ka jingngeit ki Hindu, ka jingrakhe ia ka Diwali ka dei ka dak jong ka jingjop ka Dharma ne ka hok ia ka Adharma ne ka pop, ka jingshai halor ka jingdum, ka jingbha halor ka jingsniew bad ka jingtip halor ka jingsahdum.

Ki shipai BSF ruh kila pyllong ia ka jingrakhe Diwali ha Mawpat, da kaba pyllong ia ka Diwali Mela bad la sakhi ia ka jingleit sakhi ki paidbah ha kane ka mela ba la pynkhreh da ki jingbam thiang ba lai phew jait katkum ka rukom jong ki Hindu.Na ka liang ka bor district ka la ai jingbit ban thang pynbthei ia kine ki bomb pataka hapoh 10 baje mynmiet khnang ba kan ym pynthut pat ia ki paidbah hadien kane ka por.