Khang iaid kali ka HYNF na surok Balat-Dangar-Sonatola-Umpung

Ka Hynniewtrep National Youth Front (HNYF) Southern Border Area ka la rai ban pynlong da ka jingkhang iaid kali ba khlem buh por na surok Balat-Dangar-Sonatola-Umpung naduh ka por 8 baje janmiet jong ka Lah sngi u Blei. Ia kane ka rai, ka HNYF ka la shim ha ka jingialang ba long hynne ka sngi ha IB Dangar ha ryngkat ka jingdonlang baroh ki trai bad ki nongniah kali kamai na Balat-Dangar-Sonatola-Umpung. Kane ka rai ban iakhih, la shim hadien ba ka sorkar ka la leh mynthi ban shna ia ka surok kaba la sniew kaba la buh jingeh bad jingma ia ki briew kiba iaid ba ieng bad kiba kamai.

Haba kren sha ki lad pathai khubor, u President ka HNYF Southern Border Area u Bah Kyllang S.Thongni, u la ong ba ka seng ka la shim ia kane ka rai kadei namar ba ka sorkar ka la leh kuman halor ki mat jingdawa ba ka bynta ban shna pynbha ia ka surok. “ Ha ka jingialang ngi la rai ban mih paidbah na bynta ka jingeh ka surok Balat, Umpung haduh Mawsynram-Weiloi bad ngi la rai ba naduh ka shibit janmiet ka 20 tarik Risaw, ngin pynlong ia ka jingkhang surok ba khlem buh por. Ngim kwah shuh ban iohi ia ka jingmaramot hynrei ngi kwah ba ka sorkar kadei ban ai iangi da ka surok kaba paka kaba heh,” ula ong.U la ong ba ka sorkar ka la ieh bein ia ka surok naduh Mawsynram, Phlangwanbroi shaduh Balat, Umpung bad Photkroh kaba la buh jingeh ia ka leit ka wan.

“Kane ka jingpakhang surok kan ktah ia ki paidbah, hynrei ngi pan ka jingkyrshan jong ki namar ba ngi don ka jingthmu bha,” ula ong. Katba na ka liang ki nongniah kali kamai, ki la ong ba ka jingsniew ka surok ka la pynwit ia ka leit ka wan namar ba na Balat ha Sor ha ka jingshisha dei ban poi tang 2 kynta tam ki la bam por haduh 6 kynta ban poi ha sor.“ Ka jingsniew palat ka surok ka buh jingma ia ki kali kiba iaid na kane ka thain,” la pynpaw ki nongniah kali.