Ther ka liang pyrshah ia ka EC ba pynlong ‘langknia ia ki phisar

Ka Liang pyrshah ha Khasi Hilla Autonomous District Council (KHADC) hynne ka sngi sdang ka dorbar tlang ka la ther tyngeh ia ka Executive Committee ba ialam da ka Voice of the People Party (VPP) halor ka jingkynnoh pynjah burom ia ka ophis da kaba thad paidbah ia ka Show Cause Notice ba la ai da ka Superintendent of Professional Tax halor ka jingsam Notice sha ki dukan ha ki thain Mawlai-Mawiong. Haba iashim bynta ha ka zero hour notice ba la wanrah da u MDC ka Mawshynrut u Bah S Rashir, u Nongialam ka Liang Pyrshah u Bah Titosstarwell Chyne ula pynpaw ia ka jingkyndit bad jingsngewkhia halor ka jingjia ba dang shen ha kaba ka EC ka la ai Show Cause Notice ia ka Superintendent of Professional Tax bad pynlong kam paidbah. U Bah Titos ula buh jingkylli la kane ka Notice ba la ai sha ka Superintendent Professional Tax ka long beain?. U la pan jingtip ruh haduh katno sien u Executive Member (EM) ka Taxation u donkam ban ai jing mynjur ia kum kine ki notice bad hapoh ka rule aiu ba la ai showcause notice pyrshah ia ka Superintendent. U Bah Titos ula pynpaw ia ka jingsngewkhia ba ki kam jong ka EC ka la wanrah ia ka jingsyier jingtieng hapdeng ki ophisar kaba pynlong ia ki ban artatien ha ka jingtreikam.

“Lada kane ka dei ka rukom treikam jong ka EC ba mynta, hato ngin dang ioh ia ka jingsngew skhem jong ki ophisar ban trei ia ka kam. Hato ki ophisar kin treikam da ka jingtieng” ula buh jingkylli. Ula maham ka jingpynbna paidbah ia ki kot ki sla ba dei tang ka ophis ka lah ban lam ka jinglait tuh sha ki lad pathai khubor wat ia ki file. U Bah Titos ula kynnoh ba ki jingleh ka EC ka la mih namar ki jingkynnoh ha ki social media bad ka long kaba kloi ban pynlong langknia ia ka ophis tang namar kine ki jingkynnoh. Ka MDC ka NPP na Nongshken Kong Grace Mary Kharpuri, ka la pynrem ruh ia ka EC ban ai showcause notice sha ka Superintendent professional tax bad pynbna paidbah ha ki lad pathai khubor. Ka kong Grace ka la ong kane ka dei ka bym pat ju jia satia ha ka histori ka KHADC ba la pynjah burom ia ka Ophisar. Ka la batai ba ka jingai notice ka dei shibynta na ka rukom treikam bad kam mut eh ba ki nongkhaii kin hap ban siew ia ka professional tax. Ka la buh jingkylli ruh ia ka jingkam u Chief Executive Member (CEM) ba ia kane ka jingsam notice sha ki nongkhaii la leh khlem ka jingtip ka EC, haba kdew ba ka KHADC ka don ia u caretaker CEM ha katei ka por. Ka la pynksan ba lada dei ba kam don ka EC, ka la dei ban don ka jingsynshar u Lat ka Jylla.

“Haba ki ophisar ki trei ia la ka kam, phim lah ban pynjah burom ia ki. Mano ban pynthikna ia ka jingshngain jong ki haba ki don ha ka kam” ka la buh jingkylli. Haba jubab u CEM Bah Winston Tony Lyngdoh ula pynshai ba ula ong ha ki lad pathai khubor ba ka jingsam ia ki notice ban siew professional tax la leh khlem ka jingtip jong ka EC. Ula iathuh ba ka EC ka la rai ba kan ai showcause notice lada shem ba ki nongtrei ne ophisar ki donkti ha ka jingsam ia ki notice khlem ka jingtip ka EC. U la kam ka EC ka khlem jer kyrteng ia kino kino ki ophisar haba kren sha ki lad pathai khubor hynrei, ka kyrteng jong ka Ophisar ka la lait tuh sha ki social media. Halor ka jingkynnoh ba ka EC ka la pynlong ia kane ka ophisar kum ka langknia, u CEM ula ong ba ka dei ka kamram jong ka EC bad kum ki MDC ban kyrshan ia la ki ophisar bad kim don satia ia kano kano ka jingmut ban pynlong langknia iano iano ruh. Ula kdew ia ka rule 27-28 jong ka AD Rules, 1951, kaba ai ka bor ia u ban thung ia ka jingtohkit lane ban ai ia ka showcause notice. U la kyntu ia ki Dkhot ka Iing dorbar ba kin ai lad ia ka EC ba kan shong bishar ia ka jubab jong ka ophisar bad kular ba kin sa leh ia kaba donkam.

Shuwa kane, u Executive Member (EM) ka Taxation Seibor Warbah ula ong ba ka rai jong u CEM ban pan jing pynshai na ka ophis ka dei ba leh da ka jingthmu ban pynbeit ryntih bad weng ia ka jingsngewthuh bakla na ka jingmut jingpyrkhat u paidbah. U Bah Warbah ula batai ba wat hapdeng ka hukum ban pynsangeh ia ka jingai notice sha ki nongbuh dukan barit baria, ka jingsam ia ka notice ka dang iaid, kaba pynbor ia ka EC ba kan leh eiei. “Ngin ym ailad ia kane, ngin sa pynbeit ia ka. Ngi wan hangne ym na ka bynta ka jingmyntoi ia lade hynrei ban pynbeit ryntih ia ka jingtreikam ka KHADC” ula ong.