Pynlong ka ophis u DSO ia ka CM-Youth Prokram ha Bhoirymbong Block

Ka Ophis u District Sports Officer, Ri Bhoi District, Nongpoh ha ka jingiasnohkti lang bad ka Ophis BDO Bhoirymbong C&RD Block mynta ka sngi 22 Tarik Risaw ka la pynkut noh ia ka lympung jong ki Samla ban pyni ïa ka sap ka phong jong ki khun samla ïa kaba la tip ka “Block Level Chief Minister Youth Engagement Programme 2025” kaba nyngkong halor ka Phang “Empowered Youth, Empowered Meghalaya”, kaba 2 sngi ia ka ba la pynlong ha Auxilium Skills Training Centre kaba don ha Khapmara kaba hap ha Bhoirymbong C&RD Block.

Ia katei ka Lympung ki Samla la pynlong hapoh Bhoirymbong C&RD Block la sdang hynnin ka sngi ka 21 tarik Risaw ha kaba la wan ban plie da ka BDO ka Bhoirymbong Block ka Dr.R Talang ha ka jingiadonlang u Bah Bobby L Nongbet, District Sports Ophisar, Nongpoh, Kong Rida Lyndem PTI District Sports Ophis, Nongpoh lem bad kiwei kiwei.

Ha kane ka prokram kaba ar sngi kynthih la sakhi ia ki jingiakop bapher bapher kaba kynthup ia ka jingiakop dro bad airong, ka jingïakop tem Guitar, ka jingiakop rwai bad shad tynrai, Quiz, bad kiwei kiwei, ha kaba la wan ban shim bynta da ki khun samla kynthei bad shynrang jong ka Block Jirang bad napdeng kitei ki samla na ka liang ka ophis u DSO kan jied 68 ngut ki samla kiba kynsai tam ban leit ïa shim bynta pat sha ka District Level ban ïakop pyni sap pat bad kiwei kiwei ki Block na Ribhoi.Ha kane ka sngi pynkut la wan ban pynhap pyrda noh da u Damanbait Lamare, MLA Umroi Constituency ha ka jingiasakhi lang ka BDO ka Bhoirymbong C&RD Block ka Dr.R Talang ha ka jingiadonlang u Bah Bobby L Nongbet, District Sports Ophisar, Nongpoh lem bad ki Nongtrei na ka Ophis u DSO bad na ka Ophis BDO Bhoirymbong Block, ki khynnah skul bad ki Nonghikai.Ha kaba kut pat jong katei ka lympung na ka liang ka Ophis u DSO ki la sam ïa ki khusnam sha baroh ki nongjop bad ïa ka syrnot sha baroh kiba la wan ban ïa shim bynta ha katei ka lympung kaba arsngi.