Leit jngoh u Mihir Kumar Jha ia ki ophis ka MIB ha Meghalaya

Kum shibynta ka Special Campaign 5.0 kaba dang ïaid shakhmat jong ka Sorkar India, u Mihir Kumar Jha, Under Secretary, Information and Broadcasting, New Delhi u la leit jngoh ïa ki ophis treikam bapher bapher jong ka Tnad ha Meghalaya, kynthup ïa ka Doordarshan Kendra (DDK), All India Radio (AIR), Press Information Bureau (PIB), Central Bureau of Communication (CBC) bad Regional Academy of Broadcasting & Multimedia ha nongbah Shillong mynta ka sngi. Ka jingleit jngoh ka thmu ban bishar bniah ia ka jingiaid shaphrang ka kam hapoh ka campaign bad ban pynshlur ia ki rukom treikam kiba bha tam ha ka rukom pyniaid ia ki jaka treikam, ka jingkhuid jingsuba bad ka jingsynshar. Ha ka jingleitjurip, u Jha u la bishar bniah ïa ka jingpyntreikam ïa ki katto katne ki bynta ba kongsan jong ka campaign, kynthup ïa ki jingpynkhuid, ka jingpynduh ïa ki jaboh jabaiñ, ka jingpynkylla digital ïa ki rekod lyngba ka e-Office, ka jingpyndonkam pura ïa ki jaka treikam bad ka jingpynbha ïa ki lad pynbeit ïa ki jingeh.

U la ïakren bad ki ophisar bad ki nongtrei jong baroh saw tylli ki unit jong ka MIB, da kaba ai jingiaroh ïa ki jingpyrshang jong ki ha kaba pynïahap ïa ki sienjam ba ia dei bad ka thaiñ bad ki thong kiba kham iar jong ka jingtreikam kaba paka, kaba shai bad ka jingpynïaid kam kaba iaineh. Hapoh ka Special Campaign 5.0, ki ophis jong ka nongbah Shillong ki la shim ia ki sienjam kum; ka jingpynkhuid bad weng ia ki tiar kiba la rim bha ban pynlait ia ka jaka, ka jingkylla sha ki rukom treikam e-Office na ka bynta ban pynbha ia ka rukom pyniaid ia ki file, ka jingshai bad ka jingtreikam ka bym pyndonkam ia ki kot, ka jingpynbeit thymmai bad pynitynnad ia ki jaka treikam na ka bynta ka jingtreikam kaba kham bha bad ka jingitynnad, bad ki jingpynlong ia ki jingthung dieng hapoh ka sienjam ‘EkPedMaaKeNaam’. U Mihir Kumar Jha u la ai jingiarohia ka jingiashim bynta jong ka DDK bad ka AIR ha kaba pynbiang ia ka jingkhuid jingsuba bad kaba iadei bad ka mariang ha ki jaka, ka PIB na ka bynta ka jingpyniaid ryntih ia ki jingthoh bad ki kot ki sla, bad ka CBC na ka bynta ki jingpyrshang jong ka ban ai jingtip ia ki paidbah ban pynphriang ia ka jingtip shaphang ka jingkhuid jingsuba, ka jingpynneh pynsah ia ka mariang, bad ki sienjam jong ka sorkar.

Ka Special Campaign 5.0 ka pynleit jingmut ha ka jingkhuid jingsuba, ka jingbuh jingtip, ka jingpynduna ia ka jingsahkut bad ka jingpynbha ia ka jingshakri paidbah ha baroh ki ophis sorkar. Ka Tnad Information and Broadcasting ka la pyntreikam tyngeh ia ka campaign lyngba ki unit jong ka ha ka thain bad ki field unit, da kaba pynthikna ba ia ka jingthmu jong ka Special Campaign 5.0 la pyndep ha ka rukom kaba dei. Ia kane ka jinglei jngoh la pynkut da ka jingialang bishar bniah kaba la don lang ki heh ophisar jong ka DDK, AIR, PIB, bad CBC Shillong, ha kaba la iakren ia ki rukom treikam kiba bha tam bad ki jingpynkhreh ia ki kam ban wan ban pynneh ia ka jinglong kaba bha kaba la ioh hapoh ka campaign.