Ka Mini Secretariat ha Pynursla kan wanrah ia ka synshar khadar bym noh shiliang: Conrad

U Myntri Rangbah ka Jylla Conrad K Sangma hynne ka sngi Ba-ar, ula plie paidbah ia ka Mini Secretariat ba dang shu tei thymmai bad ka Circuit House ha Pynursla, kum shi bynta ban wanrah ia ka jingshakri kaba jan sha ki paidbah.Ha kane ka jiingplie la iadonlang u Symbud Myntri Rangbah Bah Prestone Tynsong uba dei ruh u MLA ka Pynursla, u Myntri Sorkar u Bah Sanbor Shullai, Chief Secretary Dr Shakil P Ahammed, u MLA ka Sohra Bah Gavin M Mylliem, ka MDC ka Nongshken ka Kong Grace Kharpuri, ki heh ophisar sorkar, ki nongialam shnong bad ki paidbah ka thain.Haba kren ha ka jingialang u Conrad Sangma ula ong ba kane ka project ka long kum ka jingpynpaw ia ki jingthmu jong ka Sorkar Jylla ban wanrah ia ka synshar khadar bad ka jingtreikam ba janai ban pynkhlain ia ka jingshakri paidbah bad ban sam ryntih ia ka roi ka par ha ka Jylla Meghalaya baroh kawei.

“Ka Mini Secretariat bad ka Circuit House ha Pynursla ka pyni ia ka jingkut jingmut jong ka Sorkar ban pynpoi ia ka synshar khadar sha kylleng ki jaka bad ban pynbiang tarajur ia ka jingkiew shaphrang” ong u Conrad bad ka ong ba ka sorkar ka kwah ba ki nongshong shnong kin ym donkam shuh ban mareh na kawei ka ophis sha kawei pat.Haba batai ia ka jingmut jong ka jingtei ia ki Mini Secretariat, u Myntri Rangbah ula ong, ba baroh ki Tnad Sorkar ha ki kyrdan Sub Division kin treikam noh hapoh kawei ka tnum ban pynthikna ia ka jingsted, ka jingiatreilang ha ka jingai jingshakri.U Conrad ula pynpaw ia ka jingsngewnguh ia ki Shnong ki Thaw khamtam ka Raid Shabong, kaba la aiti sngewbha ia ka jaka na ka bynta ka project bad iaroh ruh ia u Symbud Myntri Rangbah Bah Prestone Tynsong uba la shimkhia khlem shongthait ban pynurlong ia kane ka project.

U Bah Prestone ula ai khublei ia u Myntri Rangbah ba ula kynthup ia ka Pynursla ha ka mat pynroi ha ka Jylla bad iaroh ruh ia ka jingiatreilang kum ka kynhun ha kaba la lah ban pynurlong ia kane ka project.Ula ong ba ka jingplie ia ka Pynursla Civil Sub-Division kan sah ha ki khana bad ka dei ruh ka khyllipmat kaba sngew sarong ia ki paidbah jong ka thain.Ha shwa kane u Myntri Rangbah ka jylla u Conrad K. Sangma bad u Bah Prestone Tynsong kila plie ia ka Block Integrated Development Complex (BIDC) kaba la tei thymmai ha Pynursla C&RD Block, East Khasi Hills District.Ha kane ka jingplie la donlang u Myntri Sorkar uba khmih ia ka Arts & Culture u Bah Sanbor Shullai, u MLA ka Sohra u Bah Gavin Mylliem, u Chief Secretary ka jylla u Dr P Shakeel Ahmed, u Bah CVD Diengdoh, Commissioner & Secretary ka sorkar jylla, ka Kong Evarinylla Warjri, SDO (Civil), Pynursla Civil Sub-Division, u Bah Peter T. Passah, MCS, Project Director, DRDA, East Khasi Hills, ka MDC ka Nongshken ka Kong Grace Kharpuri bad kiwei kiwei.