Ka sorkar kam lah ban pyntreikam ia ka FR, namar ka BDA ki pynkiew katkum ka dor marbam

Ki nongbylla Musteroll hapoh ka shatri jong ka All Jaintia Muster Roll Workers Labour Union (AJMRWLU) hynne ka sngi ki la iakynduh ia u Labour Commissioner u Jagdish Chelani ban iakren halor ka jingpynkiew ia ka bainong ne ka Floor Rate (FR) ki nongtrei muster roll nalor ka jingpyntreikam ia ka Basic Daily Allowance (BDA).Haba kren sha ki lad pathai khubor u President ka Union u bah Khroo L. Pariat, ula ong katkum ka jingpynshai u Labour Commissioner, ka sorkar jylla mynta u snem kin nym pyntreikam shuh ia ka Floor Rate kaba dei ban treikam naduh ka 1 tarik Risaw, 2023 haduh u Nohprah, 2024 namar ba ka BDA ki hap ban pynkiew katkum ka jingkiew dor ki mar bam.

Katkum ka jingong u bah Pariat, “Ka daw ba kim pyntreikam shuh ia ka FR ka long ba ka BDA ki hap ban pynkiew katkum ka dor jong ki marbam ha iew ha hat.”Ula ong ba katkum ka jingkhein ka sorkar jylla lyngba ka tnad Labour, ki lap ba ki dor ki marbam ki hiar namar ba ka GST ruh ka la hiar bad lada ki pyntreikam ia BDA jong ka 1 Risaw, 2023 kumba ju trei mynshwa, ka jingsiew ia ki Musteroll kan nanghiar shuh shuh

Halor kane, ula ong ba ka union kam pat pdiang ia kane ka jingpynshai hynrei ki kwah ba ka sorkar kan ai da ka jingthoh bad la buh por ba hapoh une u taiew na ka liang u Commissioner un ai ka jingthoh.“Ngim lah shuh ban iakren ban sngap tang da ka ktien hynrei ka sorkar ka dei ban ai da ka jingthoh, ba kin sa shong pyrkhat bad kin sa lum ia baroh ki Musteroll ha baroh ka jylla,” ula ong. kane, ka Union ka la dawa ruh ba ki nongtrei Muster roll ki dei ban ioh shuti ioh khun, bad ka bai skul ki khun jong ki ruh bad ki la pynsngew ruh ba kim kwah ban shong thait ha ka rta ba 58 snem.