Ba thmu pynlong Executive Council Meeting ha Delhi Khang tala ka KSU bad NEHUSU ia ka Administrative Block

Ka seng ki samla pule ka KSU-NEHU Unit bad ka NEHUSU mynta ka janmiet ki la leit ban khang tala ia ka ophis jong ka Administrative Block jong ka skulbah North Eastern Hill University (NEHU).Kane ka jingleit khang tala ka seng ki samla pule ka long hadien ba ki la ioh jingtip ba ha ka 14 tarik u Naiwieng 2025 kan don ka Executive Council Meeting ha Delhi ban pyniaid u Vice Chancellor u Prof. Prabha Shankar Shukla.

U President jong ka NEHUSU u samla Melamlynti Markhap bad u President jong ka KSU NEHU Unit u samla Robines Nongrem ki la iathuh ba ki la ioh jingtip ba ha ka 14 tarik u Naiwieng kan don ka Executive Council meeting ha Delhi ban pyniaid da u Prof. Shukla bad kane ka rai ka long khongpong ia kaei kaba ki la dep ban ia kren bad ka Ministry.“Ka jingleit khang tala jong ngi ia ka Administrative Block kadei namar ka jingbym lah ban pynshai ia ka jingialang jong ka EC kaban sa pynlong ha ka 14 tarik mynta u bnai. Ngin pyrshah bad ngi la rai ban pynneh ia kane ka rai ban khang tala tad haduh ba kin da ai iangi da kiwei ki rai,” ula ong.

Khnang ban pyntikna ba ki File kim dei ban leit shano shano ruh, ki samla pule ki la shim da ka rai ban khang tala noh ia ka Administration Block ban pyrshah ia ka jingthmu u Prof. Shukla ban pyniaid ia ka jingialang namar ba kim kwah shuh ba un dang don ha NEHU ne ba un pyniaid ia ka NEHU naduh ba kila iakhih kaba jur naduh mynshem snem.