Ki shipai ka Garo Labour Corps ba iakhun ha ka thma bah banyngkong yn sa ai burom, ong u Conrad

U Myntri Rangbah ka jylla u Conrad K. Sangma ryngkat bad u Myntri ka Arts & Culture u Bah Sanbor Shullai hynne ka sngi ki la buh ia u mawnongrim ban tei bad pynitynnad ia ka Cenotaph Tura, ka jaka pynsahnam ia ki shipai Garo Labour Corps ba iakhun ia ka Thma Bah banyngkong. Ha kane ka jingbuh mawnongrim la donlang u myntri sorkar uba dei ruh u Chairman jong ka Committee, Preservation of Garo Culture and Heritage u Marcuise N. Marak, ki heh ophisar sorkar, ki heh pulit bad kiwei kiwei. U Myntri Rangbah ka Jylla ula pynpaw ka jingsngewnguh ïa ki dkhot jong ka Committee na ka bynta ban pynneh pynsah ïa ka kolshor bad ka pateng jong ki Garo hapoh ka jingialam jong u Chairman uba long ruh u myntri sorkar u Marcuise N Marak, ki nongïalam niam, ki riew rangbah bad ki riew pawkhmat bad ki dkhot jong ki sengbhalang kiba la noh synniang lang ban pynwan dur ban shna pynitynnad ia ka Cenotaph.

Ula ong, baroh ki shipai jong ka Garo Labour Corps kiba la iakhun ha ka thma bah banyngkong yn sa ai burom tang shu dep kane ka Cenotaph bad mynta hi ki dang shu buh tang ïa u maw nongrim na ka bynta ban tei itynnad ïa ka Cenotaph bad ynda la dep ïa ka jingtei yn sa pynkup burom ïa baroh kiba la shakri kiba kynthup ia kito kiba la khlad noh shabar ka ri bad wat ia kito kiba la ioh wan phai noh sha la iing. U Myntri Rangbah ula kyntu ruh ia katei ka Committee ban iakynduh ia ki ba haiing jong ki dkhot ka Garo Labour Corps ban ioh ia ki jingtip ba bniah bad ka histori jong ki bad ka sorkar kan ai ka jingkyrshan ia ka committee ban leh ia ka Rsearch ne ka jingwad bniah.

Katba na ka liang jong ki dkhot jong ka Committee, ki nongmihkhmat na ki kynhun bapher, ki nongialam shong, ki ophisar bad ki paid nongshong shnong ki la pynpaw ia ka jingsngewnguh ia ka sorkar jylla kaba la shim ia kane ka sienjam.