Ka Shad Nongkrem ka khring ia ki nongshangkai pyrthei

Ka Shad Nongkrem kaba dei ka Shad Tynrai jong ka Hima Khyrim ka la kut noh mynta ka sngi ha ka jingiphuh iphieng ha kaba ki paidbah da ki spah ngut ki la sakhi ia kane ka Shad Tynrai ka Hima Khyrim kaba la long ha ka ïingsad ka Hima ha Smit. Ha kane ka sngi, ia ka shad la ialam da ka Khun Syiem ha kaba la synran lang ia ka da ki thei sotti nylla bad ki rangkynsai na kylleng ka Hima Khyrim kiba la ia mih ban iuhkjat ha ka lympung shad ryngkat ka khor ka khriam, ki jingdeng ba kordor ban pyni sha ka pyrthei ia ka niam bad tynrai u khun Khasi bad ruh ia ka riti ka dustur, ba ki kpa tymmen ka jaidbynriew ki la buh janai naduh kulong kumah. Nalor kane ki khynnah bad ki samla shynrang ki la bat ha la ki kti ia ki waitlam bad u Symphiah, da kaba pynleit jingmut bad shah shkor bad shad katkum ka jingsawa kaba mih na ki ksing bad ki tangmuri.

Ka Shad Nongkrem bad ka Pom Blang ka dei shibynta na ka jinglehniam ki khun ki hajar ka Hima Khyrim ban ainguh ia ka Lei Synshar na ka bynta ka bha ka miat u khun u hajar ha baroh ki liang ha ka jingim jong ki, la ka long ha ka rep ka riang, ka ioh ka kot, ka shongsuk shongsain, ka pule puthi bad kiwei kiwei. Ia kane ka shad ba shisien shi snem, la wan ban sakhi da u Symbud Myntri Rangbah ka jylla u Bah Prestone Tynsong, ka Nongaibuit ka Sorkar Jylla ka Kong Ampareen Lyngdoh, u MLA ka Nongkrem u Bah Ardent Basaiawmoit bad kiwei. Ka Shad Nongkrem ka la khring ia ki nongjngoh kai na kylleng ki jylla ka ri bad bad wat ia kiba nabar ri.

U Paiem (Dr) Balajied S Syiem ula ong, ba ki la pynneh ia kane ka jingriewspah ka shad tynrai kumba la pynkhamti da ki longshwa manshwa bad kumta kum ki nongioh pateng ia kane ka kolshor kaba la rim naduh kulong kumah, kumta ka long kaba donkam kyrkieh ban iada ia ka jinglong tynrai watla kila don ki jingkylla kumba la sakhi ha kane ka juk kaba mynta ha kylleng jong ka pyrthei. Hadien ba la pyndep ia ka jingshad, la pynbud pat ha ka por janmiet iaka jingknia blang ne ka pomblang ha kaba ki paidbah da ki spah ngut, kila ker sawdong ia ka madan ban sakhi ia kane ka lehniam leh rukom u Khasi naduh ki por kiba mynshwa bad ha kane ka jingpom blang la iadonlang ki Myntri, ki Lyngdoh, ki bakhraw batri kiba la iashim bynta shitrhem ban pyndep ia kane ka leh niam leh rukom.