Kum ki Syiem rung sha ki ophis sorkar, ai mynsiem u President ïa ki nongialam ka Synjuk Rangbah Shnong

Ban tehlakam ïa ka jingnang roi ki kam sniew hapoh ka dong bad ka thaiñ Ri Bhoi bad ha kajuh ka por ban Nang kyrshan bor ïa ki Dorbar Shnong, Ki Nongïalam Shnong na ki 22 tylli ki Shnong ki la ïa mir jingmut ban treikam noh hapoh kawei ka shatri jong ka Synjuk Rangbah Shnong, Marngar, Umsaw Nongbri To Umkra, Ri bhoi District ka ban dei kawei na ki Unit ba thymmai jong ka Synjuk Ki Rangbah Shnong Ribhoi District hakaba ki la jied iaki nongkitkam bad ki Nongialam ka jong ka myn haka 3 tarik Risaw. Ki Nongkitkam jong katei ka Kynhun ki Rangbah Shnong kiba la shah jied ki kynthup ïa u bah BK Tmung kum u Adviser,  President Samla Mission Tron, Vice President bah Primos Lyngdoh, Secretary bah Phaintis Syngkli, Joint Secretary bah Luskepar Kleiñ, Joint Secretary bah Elevenson Makdoh, Publicity Secretary Singrum Shylla, Finance Secretary bah Kyrshan Pamshong bad Treasurer u bah Badashisha Lymphoid.

Ïa kitei ki Nongialam bad ki Nongkitkam jong katei ka kynhun la wan ban pynskhem noh da u President Rangbah ka Synjuk Ki Rangbah Shnong ka Ribhoi District u bah BB Makdoh haka jingiasakhi lang u Bah A Lyngkhoi SI ka Nongpoh Police Station Lem bad kiwei kiwei. U Bah BB Makdoh kum u kongsan ha katei ka sngi, u la Pynshlur ia kitei ki Nongialam ba thymmai ba kum ki Nongialam Shnong kim dei ban shu hun tang hapoh ka Shnong lane hapoh ka Ophis Block hynrei ki dei ban long ki ba Shemphang bad kiba tip lut ïaki tnad Ophis bapher bapher bad ha kajuh kapor u la kyntu ruh ba kum ki Nongialam Shnong ki Dei Ban buh iaka akor ka burom hakhmat eh khnang ba kin lah pat ban ai iaka jingbishar kaba dei hok sha kiwei pat.

Hadien ba kitei ki Nongialam ba thymmai ki la ioh iaka jingpynskhem, kum ka dak ka jingsdang ban trei iaka kam ki la pynmih syndon daka jingmana sha ki paidbah lyngba u President jong ki, U Samla Mission Tron ba la mana ïaki paidbah ba kim bit ban shong dih kyiad lane leh kam sniew ha shilyntrei u Surok uba hap hapoh ka jingpeit jingkhmih jong ki bad kumjuh ruh ki la Mana ba ym shah shuh iaki Briew ba kin die kyiad beaiñ hapoh ki Shnong ki thaw ba lada ki lap kin leh da ka kam kaba tyngeh.