Plie u Conrad 2 tylli ki Project ha ka jingrakhe 50 snem ka Amlarem Civil Sub-Division

U Myntri Rangbah ka jylla u Conrad K. Sangma hynne ka sngi ula plie ia ka jingrakhe dap 50 snem ne jubuli ksiar ka Amlarem Civil Sub-Division ha madan Amlarem, West Jaintia Hills District.Ha kane ka prokram la wan iashim bynta da ki Myntri sorkar, ki MLA, MDC, ki ophisar sorkar, ki khynnah pule, nongshong shnong na kylleng ki jaka.Kum shi bynta jong ka jingrakhe, u Myntri Rangbah u la plie ruh ia u maw nongrim na bynta ar tylli ki projek ka Multi-Purpose Hall ha Amlarem kaba la mang T.345 lak bad ka Multi-Purpose Hall ha Amlariang, Nongtalang kaba T.74 lak, kum shibynta ban pynbiang ia ki jingdonkam ha ka thain.Ha kane ka sngi, u Conrad u la kynmaw burom ruh ia ki nongialam kynthup ia u bah H.Enowell Pohshna bad u bah Johndeng Pohrmen (Bam kwai ha dwar u Blei), ryngkat u bah Renswit Jungai bad u bah Welbin Jungai, kiba la noh synniang jaka na bynta ban pynieng ia ka ophis jong ka Civil Sub-Division Office.U Myntri Rangbah ula iathuh ia ki kam ba la leh da ka sorkar na bynta ban wanrah ia ka jingai jingshakri kaba iajan bad ki paidbah.“ Man ki 46 tylli ki Block office mynta ki la don ia ki iing building ba thymmai bad la thaw ruh ia 10 tylli ki block ba thymmai ryngkat ka jingpynbiang ia ki jingdonkam,” ula ong.

Ha ka kajuh ka por, u Myntri Rangbah ula pynbna ruh ban mang ia ka Mini Secretariat ha Amlarem.”Nga kwah ban iohi ba kam shen kan sdang noh hapoh une u snem. Ka Amlarem kadei ka sub division kaba la rim tam bad ka la donkam bha ban don noh ia ka Mini secretariat,” ula ong.Shuh shuh u Myntri Rangbah ula kdew ruh ia ki kam pynroi ban wanrah ha Amlarem kum ka um ha kaba yn bhah shuh shuh bad yn bhah ruh na bynta ban shna ia ka surok bad ban shna pynbha ia ka Amlarem Sub-Division.Ula pynbna ruh ba T.20 lak na ka Chief Minister’s Special Grant yn noh synniang na bynta kane ka jingrakhe ia ka jubili ksiar.

Haba iadei bad ka pule puthi ha kane ka thaiin, u Myntri Rangbah u la iaroh ia u bah Lahkmen Rymbui ba hapoh ka jingialam jong u, kane ka thain ka la kot sha ka 80% ka jingdon ki skul sorkar kiba la shna pynbha bad shna thymmai.Ula pyntip ruh ba shen yn sa pyntreikam ia ka Amlarem Water Supply Scheme .Katba na ka liang u Myntri ka tnad pule puthi u bah Lahkmen Rymbui ula pynkynmaw ba ha ka jingsdang ia ka Sub-Division, kane ka thain ka don tang katto katne tylli ki skul bad ki ophis hynrei mynta ki la kiew sha ki 30 tylli ki Lower Primary Schools, 20 tylli ki Secondary Schools, ar tylli ki College.U la kyntu ruh ia ka tnad ka rep ka riang ba kin pynkhie im biang ia ka jingrep ia u sohniamtra ha thain War Jaintia, kaba mynshwa la ju tip kum kawei na ki thain ba jur ka jingshlan ia une u soh sha Bangladesh.