Thrang ka sorkar ban pynbeit noh ia baroh ki skul ha jylla

U Myntri uba khmih ia ka Pule Puthi u Bah Lahkmen Rymbui ula ong ba ka sorkar jylla kala buh hakhmat eh ban ialeh ban pynbeit ryntih noh ia ki skul kiba don ha kylleng jongka jylla ban pynthikna ia ka jingdon ryntih jong ki nonghikai skul. “Ka thong jong ngi ka long ban pynbeit ryntih ia ki skul khamtam ha ka ban pynthikna ba ki don ia ki nonghikai katkum ka jingdonkam, kiba bun khynnah skul bad ki jingtei kiba paka” la ong u Bah Lahkmen Rymbui haba iakren bad ki nongthoh khubor hynne ka sngi.

U Myntri ula pynpaw ruh ia ka jingkyrmen ba kan poi noh ka khyllipmat ha kaba Baroh ki skul ha ka jylla Meghalaya ki don ia ki nonghikai kiba donkam bad ba kan wanrah ruh ia ka jingkylla kaba khraw ha ka jingai ia ka jingnang jingstad ia ki khynnah skul. Ha kaba iadei bad ka jingsngewkhia jong ki nongtrei hapoh ka Sarva Shiksha Abhiyan (SSA), u Bah Lahkmen Rymbui ula ai ia ka jingkular ba ka Sorkar Jylla kan pynneh ia ka skhim wat la ka Sorkar Pdeng ka pynkut noh ia ka bad ula ong,

“Ngin sa khmih ia kiei kiei baroh bad ka Sorkar Meghalaya kan sa peit ba kane ka skhim kan bteng da ka long kumno kumno ruh. Ngim pat poi ha ka khep ban rai ba haduh katno ngi donkam ia ka pisa. Ngi dang lum jingkhein bad kyrmen ba ngin sa ioh ia ka jingkhein jingdiah ha ki khyndiat sngi ban wan”.