Kyntu u MR ia ki ophisar thymmai ban buh thong ban wanrah jingkylla ia ki nongrep

U Myntri Rangbah ka jylla u Conrad K Sangma ryngkat bad u Myntri ka rep ka riang u Timothy D Shira hynne ka sngi ki la iashim kum ki kongsan ia ka jingialang pynhap pyrda ia ka Induction Training Programme na bynta ki ophisar thymmai ha ka MAS-III jong u snem 2025 ha IATC, Upper Shillong.Ha ka jingialang la donlang u Dr Shakil P Ahammed u Chief Secretary ka jylla bad ki heh ophisar sorkar na ki tnad bapher.Haba kren ha ka jingialang u Conrad ula kyntu ia ki ophisar thymmai ban buh thong ban wanrah ka jingkylla ha ka jingim ki nongrep bad ban ai mynsiem ban wanrah ia ka jingkylla ha jingim ki nongrep kum ka sienjam ban jam shakhmat.

U la ai khublei ia kine ki ophisar thymmai bad ula iaroh ruh ia ka IATC kaba la pynthikna ha ka ban ai ia ka jinghikai pyntbit kaba salonsar bad ia ki prokram na ka bynta kine ki ophisar thymmai khnang ba kin lah ban pynkhreh bha ia lade ha kaba ia dei bad ka kamram kum ki ophsiar kiba khmih ia ka rep ka riang ha ka jylla.U Myntri Rangbah ula kyntu ia ki ophisar ba kim dei ban duh mynsiem haba ki mad ia ki jingtynjuh hynrei ki dei ban shakri da ka mynsiem, da ka jingthmu bad da ka thong ban pynwan sha ka jingkylla ia ka jingim jong ki nongrep kiba don hapoh ka jylla. U la ong, ba ka long kaba kongsan bha ia ka sorkar, ki ophisar ha ki Directorate bad ki ophisar kiba don ha ki shnong ki thaw ban iatreilang kum ka kynhun ban pynbeit ryntih ia ka rukom treikam ban lah ban pynurlong ia ka thong.

U la ong, ba ka jingdon kiba bun ki mishon ka plie lad ban thaw ia ki jingthmu bad iaka rukom treikam ban pynurlong ia ka thong ha ka por kaba la buh kaba don ruh ia ka jingkitkhlieh ia man la ki riewshimet ha ki kyrdan bapher bapher ha ka kam ai jingshakri ia ki paidbah.Katba na ka liang u Timothy D Shira, ula ong ba 70 % jong ki jingdon ki nongshong shnong ha ka jylla ki dei kiba shong basah ha ki thain nongkyndong bad kiba bun na ki kidei ki nongrep. Kumta ka jinglong jingman ki nongrep ha ka jylla kam long kaba bha bad kidei kiba duk, kumta ban kyntiew ia ka ioh ka kot ka jongki kan shong eh ha kine ki ophisar.Ula kyntu ia ki ophisar ba kidei ban iakynduh bad iakren man la ka por bad ki nongrep bad ba kin pyndon bynta bad ki nongrep da kaba don ruh ia ka jingiai shah, ka jingsngewsynei bad da ka jingsngewkhia.