Bthah ka sorkar ia ki karkhana ban siew T.9 per km, per ton ka baikit dewbilat

Ka sorkar hynne ka sngi ka la rai ban bthah ia ki karkhana dewbilat (Cement) ban siew T.9 per km, per ton ia ki baroh trok ki kit dewbilat hapoh u pud u sam jong ka Jylla Meghalaya. Ïa kane la pyntip da u Symbud Myntri Rangbah ba khmih ia ka tnat Transport u Bah Sniawbhalang Dhar hadien ba wai ka jingïalang ba khlieh da u Symbud Myntri Rangbah u Bah Prestone Tynsong haka jingdon lang ki trai kharkhana Dewbilat, ka Jaintia Hills Cement Manufacturers Association, Meghalaya Commercial Truck Owners & Drivers Association (MCTODA), Jaintia Hills Truck Owner’s Association (JHTOA) bad ka East Jaintia Hills Truck Owner’s & Transporter Association (EJHTOTA).Haba kren shaki lad pathai khubor u Bah Sniawbhalang Dhar u la ong ba ka jingïalang ka long kaba seisoh bad ki don katto katne ki mat baka Sorkar Jylla kala dep ban shim rai bad ki don ruh katto katne ki mat ba ka Sorkar ka dang hap ban shong jingïalang haki sngi ban wan.

“Ka rai ba nyngkong ba ngi la shim bad naka liang ka MCTODA, JHTOA bad EJHTOTA kila mynjur ka long ba ba ki trai karkhana dewbilat kila mynjur ruh ban siew noh T.9 per km, per ton iaki trok naka bynta baroh ki jait surok ba ki iaid haba ki kit dewbilat hapoh u pud u sam jong ka Jylla Meghalaya” la ong u Bah Sniawbhalang. U Symbud Myntri Rangbah u la ong baroh ki kynhun jong ki trok ba kit dewbilat kila mynjur bad kila pynpaw ka jingkmen ïa ka dor thymmai baka Sorkar kala bthah iaki trai kharkhan dewbilat ban siew shaki. Haba ia dei bad ka jingdawa ka MCTODA ban siew daka juh ka dor haba kit dewbialt sha kiwei ki Jylla, u Symbud Myntri Rangbah u la ong “Iaka dor bai kit dewbilat shabar ka Meghalaya ka MCTODA kan hap ban ïakren pynbeit hi bad ki trai kharkhana dewbilat”.

U Bah Sniawbhalang u la ïathuh ruh ba haka jingïalang, ka MCTODA bad kiwei ki kynhun kila dawa baka Sorkar kadei ban mang lypa 120 tylli ki trok jong ki trai Jylla ban kit dewbilat naki karkhana dewbilat. “Mynta 80 tylli ki trok trai Jylla kiba kit dewbilat man ka sngi, ki Association kila dawa ban mang lypa 100 tylli bad naka liang ka Sorkar kala tyrwa ban mang lypa sa 20 tylli ki trok” u la ong.Haba iadei bad kane, u Symbud Myntri Rangbah u la ïathuh ba ki trai karkhana dewbilat kila pan por shi taiew ban shim halor ka jingdawa ban mang lypa 120 tylli ki trok trai Jylla ban kit dewbilat naki karkhana.“Ki trai karkhana dewbilat kila pan por shitaiew, ngi la buh 21 tarik Naiwieng ban ïakren biang bad ki trai karkhana ban shim rai halor ka jingdawa ban mang lypa 120 tylli ki trok trai Jylla” u la ong.