Ki nong Japan kumjuh ki briew na NE ha ka kolshor ka bam ka dih

U Myntri Rangbah ka Jylla Conrad K Sangma hynne ka sngi ula plie ia ka Japanese Language Training Programme ba la pynlong da ka Meghalaya State Skill Development Sociaty, Department of Labour, Employment & Skill Development ka Jylla ha Moint View Building, Barik, Shillong.Ha kane ka jingialang la iadonlang u Myntri ka Tnad Labour u Bah Methodius Dkhar bad ka Chairman bad CEO ka ASEAM Group Co Ltd u Nishukwa Toshiaki San, ki nonghikai na Japan bad ki ophisar ka MSSDS.Haba kren ha ka jingialang u Conrad ula ong, ba ka rukom pyrkhat jong ka sorkar ka long ban pynleit jingmut bha bad kam kwah ban don ka jingiateh bad bun ki ri ka pyrthei namar lada iatehlok bad baroh kan nym don satia ia ka jingiadei bad no bad no ruh.
Ula ong ba ka ri Japan bad ki Jylla ka Thain Shatei Lam Mihngi ki don ka jingiasyriem ha kiba bun ki liang, la ka long ha ka bam ka dih, ka kolshor bad ka ri Japan ka dei kaba la iatreilang bad ka ri India la bun bun snem bad ula iathuh ba ar snem mynshuwa tang ar ngut ki Nurse la phah sha Japan bad mynta ki don haduh 37 ngut ki nurse ha Japan bad bun kin sa nang leit shuh shuh ha ki bnai ban wan.“Ki nurse jong ki kiba trei ha Japan mynta ki la don ha ka N4 Grading bad ngi kyrmen ba ki Nurse jong ngi kin poi ha ka N3 Grade ba kin ioh ka tulop ba kham heh. Ki nurse jong ngi, ki la lah ban phah pisa sha la iing haduh T.1 lak bad ka jingkylliang pisa ha ka Jylla jong ngi lyngba kine ki 37 ngut ki nurse ka la kot kumba T.5 klur shisnem” la ong u Conrad bad ka iathuh ba ka Sorkar ka kwah ban ai ia ki kali sha ki samla ka Jylla ba kin leit sha Japan ym tang ban kamai jakpoh hynrei ban ioh ruh ia ki jingshemphang.
Ula pyntip ba 37 ki Nurse ba don ha Japan ki hap ban leit hikai pyntbit ia ka ktien Japan ha Bangalore haduh hynriew bnai hynrei kine ki samla ba mynta ki long donbok namar kin ioh ia ki jinghikai pyntbit ha Shilllong hi khlem da donkam shuh ban leit shabar jylla.U Myntri Rangbah ula pdiang sngewbha ruh ia ki ar ngut ki nonghikai na Japan bad ula ong, ba watla kin mad ia ki jingtynjuh hynrei ka sorkar bad ki paitbah ka Meghalaya kin leh ia kaba bha tam ban pynthikna ba ka jingsah jong ki kan long kaba bit ba biang hapoh ka jylla.Nalor kane ula kyntu ruh ia ki samla pule ba kin leh bha tam ban pyndonkam ia kane ka lad ban kyntiew ia ka sap bad ia ki lad ban ioh kam.Ki don 86 ngut ki samla pule ba la pynrung kyrteng ha ka Japanese Language Training Programme ban ioh ia ka jinghikai ha ka ktien Japan ha ki hynriew bnai.