Na ka rynsan ba rit mynta ka la heh ka Shillong Literary Festival : Conrad

U Myntri Rangbah ka jylla u Conrad K. Sangma hynne ka sngi u la ong, “Ka Meghalaya ka dei ban kylla long kum ka jaka kaba ka thoh ka dei ban long shibynta ha ka rukom treikam bad ha ka kolshor ka jong ngi”.U Conrad ula kren ia kane ha ka jingleit iashimbynta ha ka sngi Baar jong ka Shillong Literary Festival 2025 kaba la long ha Nan Palok ne Ward’s Lake, Shillong.Ula ong, ba kane ka tamasa kala kiew shaphrang na ka jingsdang kaba rit bad mynta kala kylla long syndon kum ka rynsan kaba heh bad ula ai ruh ka jingtyrwa ban sdang ia ka jingiakob thoh ban pynshlur ia ki nongthoh kiba dang khynnah, khnang ba ka jylla kan long kum ka jaka kaba ka thoh ka tar kadei ban long shibynt ha ka jingtreikam bad ha ka kolshor.

U Conrad ula pynbna ruh ha ka jingialang, ban pyniar ia ka jingai ia ka Chief Minister’s Research Grant, ha kaba 75 ngut ki Scholar mynta kin ioh jingkyrshan ban leh ia ka Research ne jingwad bniah halor jong ki jaidbynriew Khasi, Garo bad Jaintia bad ula iathuh ba kala don ruh kawei ka kynhun wadbniah kaba lah iaid shakhmat ban buh ha ki jingthoh halor ki tynrai, histori, ki jingiathuh kiba iadei bad ka kolshor jong ki Khasi, Jaintia bad Garo.Ula pynpaw ia ka jingwanphai jong ka T.133 Klur na ka jingkynshew tyngka kaba dang shen, ha kaba iadei bad ka kolshor, kaba la nang pynkhlain ia ka jingangnud jong ka sorkar ban pynlong ia ka nongbah Shillong ha ka kyrdan kum ka nongbah ban wan ha kaba iadei bad ka Arts bad Literary.Ha kawei pat ka liang u Myntri Rangabh ula pytnip ba yn nang pynkylla dur bad pynitynnad ia ka Nan Palok ha kaba la dep ban bhah T.20 Klur bad yn sa mang shuh shuh sa T.30 Klur ban buh ia ki ‘Laser’ ban pyninam ia ka histori jong ka Meghalaya bad ban shna ia ki jaka ne ‘Arena’ kiba paka ban ioh pynlong ia ki prokram halor ka kolshor ha baroh shi snem.

Ka tamasa ha ka sngi ka baar, kala sdang da ka jingpyllait paidbah ia bun tylli ki kot kaba kynthup ia ka River Traveller – Journeys of the Tsangpo-Brahmaputra, Wad ia ka malade (Khasi), European Writing in the Khasi Hills, BSF and Meghalaya – Through the Lens of a Border Man bad From Isolation to Integration: Geopolitics of India’s Northeast.Nalor kane kala don ruh ka jingiasyllok bad ka jingiakren bad ki riewpawkhmat, riewshemphang bad ki nongthoh kiba pawnam ka ri, ha kaba kila ai jingkren halor kiba bun ki mat ha kane ka tamasa bad lap ynkut pat ia kane ka tamasa da ka tem ka put bad ka rwai bad ka jingpyninam ia ka kolshor tynrai, kaba la pynsngewtynnad ia ki baroh kiba la wan iashimbynta ha kane ka tamasa.