Ha ka jingtohkit lap ksai ki pulit ba don ki briew ba shoh ia u Trophimos

U Superitendent of Police (SP) East Khasi Hills u Bah Vivek Syiem hynne ka sngi ula pyntip ki Pulit ki dang ap kaiphod Post Mortem shuwa ban shim rai ban iakhun pyrshah ia ka jamin (Anticipatory Bail) jong ki 11 ngut ba la ioh na District Council Court.

Kane ka long hadien ba ki Pulti ha ka jingdonlang Magistrate, ki Doctor bad ki nongsakhi ki la khlong ia ka met u Bah Trophimos Khongmawloh ba la kynnoh shah bom iap ha u Rangbah Shnong ka shnong Pynter lem bad ki dkhot ka Village Defence Party (VDP).

Haba kren sha ki lad pathai khubor u Bah Vivek ula iathuh ia ka met jong u Bah Trophimos Khongmawloh la khlong bad la pyndep ia ka Post Mortem.

U Bah Vivek ula iathuh ka met ka la pyut namar ka jingjia shah kynnoh bom iap u Bah Trophimos Khongmawloh ka la jia naduh 7 tarik Jymmang bad ula kyrmen ki Pulit kin ioh ksai ban pynthikna, la ka jingiap ka dei ba shah shoh ne u iap namar ba u leh hi.

U la pynthikna katkum ka jingtohkit ba la iaid ka kdew ba don shisha ka jingdonkti ki katto katne ki briew ban shoh ïa u Bah Trophimos Khongmawloh hynrei haduh mynta ym pat tip ia ka daw ka jingiap.

“Ia ka met la khlong bad la pyndep ia ka Post Mortem mynta ka sngi, ngin ap ka kaiphod Post Mortem ban pynthikna u iap shah shoh ne u iap hi” la ong u SP.

“Hadien ba la ioh kaiphod ngin shim rai, ban iakhun ha iingbishar ban pyndam noh ia ka jamin bad ban ban kem ia ki 11 ngut ki briew ba kynnoh donkti ban shoh ïa u Bah Trophimos Khongmawloh” ula ong.