Rah ka Mawlai Presbyterian ha ka ïakob rwai tynrai bad u Reward ha ka iakob iathuh khana puriskam

Ka Mawlai Presbyterian Higher Secondary School ka la ioh rah ia ka nam lahduh ha ka iakop rwai tynrai jong ka Mawlai Inter School kaba la pynlong da ka Lamatti Socio & Cultural Organisation (LS&CO) myn ha ka sngi saitjain jong ka taiew.
Ka skul kaba wan ba ar ka dei ka Sacred Heart Girls Higher Secondary School bad kaba wan ba lai pat ka dei ka MayQueen Secondary School.
Ka Lamatti Socio & Cultural Organisation ka la pynlong ia kane ka iakop rwai tynrai jong ki skul Mawlai ban kynmaw burom ia i Dr. Hamar Babiang Kharlukhi (Ba la khlad noh) iba la long uwei na ki rangbah uba la noh synniang ia ki jingrwai tynrai bad ia kine ki prokram la iarap pisa ruh da ka Sorkar Jylla hapoh jong ka CMYD Scheme jong u snem 2024- 2025 lyngba ka ophis jong ka Deputy Commissioner East Khasi Hills District.
Ka Kongsan ha kane ka iakop rwai tynrai jong ka LS&CO ka la long ka Kong Silbi Passah, Padma Shri bad ki nongbishar ki kynthup ia u Bah Phyrnai Marbaniang, Bah Herlambok War bad u Bah Desmond Rimaki Sunn, ki kaitor ba pawnam bha jong ka Jylla.
Kumjuh ruh ka LS&CO ha ka sngi thohdieng jong ka 15 tarik u Jymmang ka la pynlong ruh ia ka iakop iathuh khana puriskam bad ka workshop ia ki khynnah skul halor ka Bio-engineering, bad ki don haduh 10 tylli ki skul na Mawlai kiba la wan iashim bynta ha kine ki prokram.
Ha ka iakop iathuh khana puriskam ba la ai nam ha ka kyrteng jong i Dr. Pherlok Lamare (Ba la khlad noh), u Reward Dohtdong jong ka Mawlai Presbyterian School u la ioh ia ka kyrdan kaba nyngkong, i Aihunmeiaka Khongwar bad u Saman Nangmer Mukhim na ka skul MayQueen ki la wan ha ka kyrdan kaba ar bad kaba lai.