Kheiñ Dewthala ka KHADC ïa ka hok

U Syiem barim ka Hima Mylliem u Paiem Laborious Manik Syiem ula ong ba ki bor synshar ha Khasi Hills Autonomous District Council (KHADC) ki la khein dewthala bad ki la pynkhein ia ka hok ka riti kaba la pyndep da ka Hima Sohra ha ka Longsyiem Mansyiem. Ia kane u Paiem ula kren ha ka sngi ba pynkhuid ia ka met ba sah jong ka Syiemsad Iartimai Syiem. U Paiem ula ong ba kita ki bor synshar ha ka jaka ban pynskhem ia ka riti dustur ba la buh, hynrei kim shym la leh kumta bad ki la pynkulmar pynban da kaba iathuh ba dang don sa uwei u ban long Syiem ha kaba ka Dorbar Hima ka riti dustur ka Hima kam shah da lei lei.

“Ka Hima Sohra kam shah da lei lei ban shim lane knieh noh lane khein dewthala ia ka longsyiem mansyiem, lada um dei na ka bynta ka iingsyiem, na ka kur longsyiem bad na ka kpoh ba dei bad uba dei thik uba dang bat ia ka niam ka rukom katkum ba la seng da u longshwa manshwa,” ong u Paiem Laborious. U la ong ba wat u nongjop thma na shilliang duriaw uba la jop thma ia ia ka ri Khasi da u kuli ka wiat ka stieh, uba la synshar la jan dap spah snem ha kane ka ri, um shym pynduh ia kata ka thang syiem ha ka Hima Sohra hynrei ula buh rekod pynban kumno la pyndep ia ka thang Syiem ha ka Hima Sohra.

U Paiem ula bynrap,“ Uba stad u burom ia ka jingstad bad um shym pynduh ia kawei ka sain dorbar u Khasi naduh ka Dorbar iing, Dorbar kur, Dorbar shnong, Dorbar Raid ne ka Dorbar Hima. U nongwei shisngi uba la jop thma iangi u buh rekod ia kata. Hynrei balei kine kiba dei ki khun ki ksiew jong u Hynniewtrep Hynniew Skum ba shong ha ka jaka jong ka ain, ki leh lyndet ia kata. Balei ki kren pynban ia ka ilekshon balei ki kren ban pynshit ban pynpra. Ka long kaba sang ho ban thom ia ka riti ka long kaba ma, namar ha ka riti dustur sdien ka long bynriew, sdien ka jinglong kyrpang jong ka jaidbynriew.”