Kwah ki nongïalam ka BJP ban ïakhun elekshon MP u Bah Sanbor

Ki nongialam ka BJP Meghalaya ki la leit ia-kynduh ia u Myntri ka Sorkar Jylla u Bah Sanbor Shullai ban kyrpad ia u ban iakhun ia ka elekshon shiteng samoi jong ka MP Lok Sabha na Shillong Parliamentary Constituency.
Haba iakren bad ki katto katne ki nongialam ka seng BJP, kila iathuh haduh mynta kila don 5 ngut ki rangbah na ka seng BJP kiba la phah ia ka jingthoh ba ki long kiba kloi ban iakhun ia ka elekshon MP Lok Sabha, hynrei kiba bun hi ki nongialam bad ki nongkitkam ka BJP ki kwah ba u Bah Sanbor Shullai udei ban mih biang shakhmat ban iakhun ia kane ka elekshon MP bad u dei u nongialam uba paw bad u lah bha ban jop ia ka elekshon.
“Kumba ju long, ka seng BJP ka ju khot aplikeshon ia ki kyrtong kiba don jingthmu ban iakhun ia ka elekshon hadien ba ka ECI kala pynbna ia ka tarik ban pynlong elekshon, hynrei na ka bynta kane ka elekshon shiteng samoi jong ka MP, kila don 5 ngut ki riewrangbah kiba la phah da ka jingthoh sha u President ka BJP Meghalaya ba ki don ia ka jingangnud ban iakhun ia katei ka elekshon” la ong ki nongialam ka BJP.
Ki la ong, watla 5 ngut ki rangbah kila kloi ban iakhun hynrei ka seng kan sa ia shong pyrkhat bha ban sei beit da uwei u kyrtong uban ia monlang da baroh ban pynthikna ba lada u iakhun ia ka elekshon MP shiteng smaoi un ioh ia ka jingjop kaba don burom.
Ki la iathuh ba kiba bun hi na ki nongialam ka BJP ki kwah ba u Bah Sanbor un iakhun ia ka elekshon bad kila leit ruh ban iakynduh bad ban pynkohnguh ia u Bah Sanbor ban iakhun ia katei ka elekshon bad kila pynpaw ruh ba kila leit iakynduh ia ki nongialam ka BJP ha kylleng ki district kaba hap ha Shillong Parliamentary Constituency ba kin trei shitom ban pynsngewthuh ia ki paitbah ban pynjop don burom ia u Bah Sanbor ha ka elekshon.
Kiba bun ki nongialam ka BJP kila pynpaw ruh ia katei ka jingsngew ka jongki hakhmat jong u President ka BJP Meghalaya ba udei ban phah sha Delhi, thik tang ia ka kyrteng jong u Bah Sanbor Shullai kum u kyrtong ban iakhun ia ka elekshon bad ba kin shim ruh ia ki sienjam ban iakren sngewthuh bad baroh ki nongialam ka seng ba dei ban pynmih beit thik tang ia ka kyrteng u Bah Sanbor ba un long u kyrtong ka BJP.
Kine ki nongialam kila pynpaw ruh ba kin sa shong ia ka jingialang ban pynkhlain ia ka jingioh vote bad ia ka jingioh jingkyrshan u kyrtong ha ka elekshon khamtam haba kila shim ba u Bah Sanbor Shullai ula long lypa u nongialam uba la ithuh, tip bad ieid da ki paitbah ka jylla bad ka seng BJP ka don ruh ia ka jingkyrmen ba mynta ka kynti kan khur ia ka jingjop ha ka MP Elekshon.
Kumban shu pynkynmaw dang ha ki khyndiat taiew, u Bah Sanbor Shullai ula ong ba u long uba kloi ban iakhun ia ka elekshon shiteng samoi jongka MP Lok Sabha lada jia ba ka seng BJP Meghalaya ka bthah ia u ban iakhun ia ka elekshon.