Khang tala ka HNYF ïa ka karkhna saiñ jri ha Mawsmai

Ki Nongialam ka Hynniewtrep National Youth Front, (HNYF)  Northern Region mynta ka sngi ki la leit ban khang tala syndon ïa kawei ka karkhna saiñ jri ka Resource Rubber Pvt. Ltd. Kaba don ha Ka Shnong Mawsmai hadein ba ki la ioh jingtip ba u trai jong katei ka karkhana uba dei u bar jylla u la shu pynïaid beiaiñ ia katei ka karkhana khlem da pynbiang iaki kot ki sla haka rukom kaba dei. Haba kren sha ki lad pathai khubor, naka liang u bah Heasting Lyngdoh U President Ka HNYF Northern Region u la ïathuh ba jingleit jong ka Seng ban khang tala ia katei ka karkhana ka dei hadien ba ki la ioh jingtip ba u trai jong katei ka karkhana u la shu pynïaid beaiñ iaki kam khlem da don ki kot ki sla kiba biang.

Shuh shuh u la iathuh, ba u bar jylla uba pynïaid ia katei ka karkhana u la shu leh benami khlem da ithuh ithaw mano ba long trai ia kane ka jaka, hynrei ka Seng kam sngew dei ban ailad iaki bar jylla ban pynïaid baheh iaki kam ki jam jong ki hapoh ka jylla Meghalaya khlem da pynbiang iaki kot ki sla kiba biang. U Bah Barnabas Manih Vice President HNYF Seng Kmie bad u Bah Alfred Mallai kum u Secretary ka HNYF Northern Region, Ki la iathuh, ba katkum ki kot ki sla ba la iohi, ia katei ka jaka kaba don ka karkhana la long trai da u Bah CB Syiem, hynrei kine ki bar jylla ki la shu wan ban pynklumar hapdeng para jait bynriew khasi bad u la ong ruh ba utei u bar jylla uba pyniaid ia katei ka karkhana u la shu pyndonkam da ka kyrteng jong kawei ka thei khasi ban kam trai ia katei ka jaka.

Shuh shuh ki la iathuh ba, katei ka karkhana bad ka jaka ka dang don haka mukotduma bad ailad ba ka iing kashari kan leh ia kaba donkam, hynrei ki la Pynpaw pat iaka jingsngew lyngngoh ba kumno u trei jong katei ka karkhana un dang pyntreikam iaki kam jong u Napoh Napoh. Ha katei ka sngi, Naka liang ka Hynniew Trep National Youth Front ka la khang syndon daki tala ïa katei ka Karkhana dakaba buh ruh ka jingbyrngem ba lada u trai jong katei ka karkhana un dang pyntreikam biang khlem da pynbiang shuwa ïaki kot ki sla, ka Seng kan sa sa leh daki kam kiba kham tyngeh.