Shen yn plie ka sorkar ia ka jingkieng thymmai ha Umiam

Ka jingtrei ban tei pyndep ia ka jingkieng kaba thymmai ha Umiam kaba don harum jong ka jingkieng rim, ka la nang iaid shaid shaid bad la antad ruh ba tang hapoh ki khyndiat bnai yn lah ban pyndep lut ia ki kam kiba sah namar kumba long mynta kane ka jingkieng kaba la long kaba la paka bad ban pynsuk ia ka iaid ka ieng ki kali heh bad ki bus night super.

Ia kane ka la pynpaw da u Bah Damanbait Lamare u MLA ka Umroi Constituency hadien ka jingleit jurip jong u ia ka jingpyntrei ia ka jingtei ia kane ka jingkieng thymmai ha Umiam, ha kaba la lap ba bun na ki kam ki la dep lut kaba sah satang ban ai rong pynitynnad ia kane ka jingkieng bad ka jingsiang rong ia ki katto katne ki surok kiban iaid lyngba kane ka jingkieng thymmai.La synran lang ha kane ka jingleit jurip u MLA ka Umroi, da u Executive Engineer ka tnad PWD Umsning Division u Bah D. Laloo bad kiwei kiwei ki ophisar na ka tnad PWD.

Na ka liang u Bah Lamare, u la ai ka jingiaroh kaba khraw ia u Contractor u ba la pyntrei stet ia ka jingtei ia ka jingkieng thymmai ha kaba tang hapoh 7 bnai bun ki bynta jong kane ka jingkieng la dep pyndep kaba sah satang katto katne ki bynta, ha kaba na ka liang ka sorkar ka la mang 23 Klur tyngka ban tei ia kane ka jingkieng bad buh por ruh 24 bnai ban pyndep hynrei da ka jingtreishitom jong u Contractor ki kam ki la jan dep lut, bynrap u Bah Lamare. U la ong ruh, ba ka jinglah ban plie kloi ia kane ka jingkieng kan long shisha ka jingmyntoi ia ka jylla khamtam ki paidbah nongleit nongwan na ka jingiohlad ban iaid ki kali heh bad ki bus night super kiba dang hap sangeh ha Umiam, bad lada kine ki bus night super kin ioh pat ban iaid sha ka jaka ieng jong ki ha ISBT Mawiong, kane ka jaka ieng ki bus ruh kan lah ban treikam pura bad ka jingmyntoi kan long lem ia baroh.