Ki nongialam kim dei ban shah ialam bakla: kyntu u samla Lambokstar

Ka Khasi Students Union (KSU) hynne ka sngi u Blei ka la pyllong ia ka jingialang kynmaw burom ia ka lyngkhuh sngi iap ba 31 snem jong u Bah Bull.N Lyngdoh. Ha kane ka sngi, ka seng ka la buh syntiew ruh ha u motdur jong u bah Bull ba ieng ha Malki bad ka la pyllong ruh ia ka jingsngap jar ba shi minit kum ka dak ban kynmaw burom ia une u nongialam ka seng. U President Rangbah ka KSU u bah Lambokstar Marngar haba kren ha kane ka sngi, ula pynkynmaw ia ki kam ba radbah ba la noh synniang da u bah Bull na bynta ban iada ia ka ri bad ka jaidbynriew. Ula ong ba ka kam jong ka seng ka long ban aiti met bad mynsiem ban iakhun na bynta ka jingshong shngain ka ri bad ka jaidbynriew baroh kawei. U bah Lambokstar ula ong ba kum u nongialam kin iai pynskhem bad yn iai pyntikna ialade ban nym shah ialam bakla bad kin iai bteng ia ka jingiaid lynti jong ki.

Katba na ka liang u Vice President ka KSU u bah Biangbor Paliar, ula ong ba u bah Bull u dei uwei na ki nongmait lynti ban iakhun pyrshah ia ki mynder ri ha ki por ba ki thmu ban thombor ban knieh ia ki shnong ki thaw ki jaka puta ha kane ka ri. “ Ngi donbok kum ka jaidbynriew ba don une u nongialam uba la len ialade ban iada ia ka jaidbynriew bad nga kyntu ia baroh ba ngin trei shitrhem ban bud ia ki matti jong une u nongialam,” ula ong. Ha kajuh ka por, u bah Paliar ula pynkynmaw ia ki jingdawa ka seng kiba dang sahteng haduh mynta kynthup kum ka Inner Line Permit (ILP). Ula ong ba ka seng na ka por sha ka por ka la dawa na ka sorkar ban wanrah ia ki ain kum ka ILP ban iada ia ka jaidbynriew na ka jingwan rung kyrthlep ki briew ba nabar, hynrei kaba sngewsih ka long ba ka sorkar ha u 2020 ka wanrah pynban ia ka ain ka bym don bniat ka Meghalaya Identification, Registration (Safety & Security) of Migrant Workers Act, 2020.

“ Halor kane, ka seng ka la pyllong da ka jingiakhih ban pyrshah ia ka jingwanrah ka sorkar ia kane ka ain ka bym don bniat ban iada iangi namar kane ka ain ka long pynban ka ain ban pdiang sngewbha ia ki mynder kiba wantrei wan ktah ha kane ka jylla,” . Ula iawer ia baroh ba lada ka sorkar kam wanrah ia ka ain ba skhem ban iada ia ka jylla, kin shim bad kin bud ia ka sienjam ba la ialam da une u radbah u nongialam jong ka seng ban iakhun tyngeh khnang ban pyntikna ba ki pateng ban wan kin lait na ki jingeh.Ha kane ka sngi la donlang ruh kiba haiing hasem jong u bah Bull bad la ioh ruh ia ka jingkren na u General Secretary ka KSU WKH u bah Franklin Syiemiong, u President KSU Malki unit u bah Iashah Mukhim, u President KSU Nehu Unit, Robin Nongrem nalor kiwei de.