Na ka “One Love, All Rise” shongshit ka Tamasa Megong ha Garo

Ka Me’gong Festival 2025 ka la kut noh ha ka miet jong ka sngi Saitjaiñ ha kaba ka la khring ia 55,000 ngut ki nongwan kai na kylleng ki Jylla ha kine ki ar sngi jong katei ka tamasa kaba la long ha rilum Garo. U Myntri Rangbah ka Jylla u Conrad K. Sangma ula plie ia kane ka tamasa kaba ia dei bad ka kolshor jong ka rilum Garo kaba don ruh ia ka jingpynbyrngia ha ka liang ka tem ka put na ki kynhun ne nongrwai na kane ka ri bad kiba nabar ri ruh.Ka Kanika Kapoor ka la plie ia kane ka miet ba ar jong ka tamasa, da ka jingrwai ba pawnam bha jong ka kaba latip kum ka Chittiyaan Kalaiyan, Baby Doll, Jawaani Le Doobi- bad ka la ai khublei ia ki paidbah ka Meghalaya namar ka jinglong kawei na ki jaka ba sngewtynnad eh na ki jaka ba ka leit rwai. Ki paidbah ki la dap ruh da ka jingshongshit haba ka kynhun rwai pop ba pawnam na ri England, ka ‘Blue’, ka la rwai ia ki jingrwai kiba sngewtynnad bad pawnam ki jong ka kiba kynthup ia ka One Love, All Rise, Guilty, One Last Time bad kiwei kiwei.

U Antony Costa na ka kynhun Blue ula iaroh ia ka jingshongshit jong kane ka tamasa bad ong ba ki paidbah ka Me’gong kila shongshit bha, katba u Simon Webbe ula ong ba ka Ri-lum Garo kadei ka paradis bad ula ai khublei ia baroh ba ka jingwan ka jongki kadei da ka jingieid. U Prateek Kuhad ha ryngkat u nongrwai Cold Mess bad Saansein, kila pynkylla ia ka madan da ki jingthaba ki light hashuwa ba u Yellow Claw ula pynkut ia ka miet da ka jingtem kaba la pynkhynniuh ia ki paidbah kiba la wan sha kane ka tamasa ha Bolbokgre-Watregre. Ha syndah kane ka rynsan, ka Kingfisher ruh kala buh ia ka rynsan iaput iatem da ki nongrwai ba pawnam ka thain ba kynthup ia ka Hoi Hoi Makbil, G-Hill Finest, Crack Gang, Rough Road bad Nokpante.

 Ka jingtuid ki nongwankai khamtam ki riewieid jingrwai ka la sdang naduh ka sngi Thohdieng bad ha kane ka sngi, la pynshongshit ia kane ka tamasa da u nongrwai ba pawnam ka pyrthei u Richard Marx, u Julian Marley, Nucleya bad Neeti Mohan. Nalor ka tem ka put, ka Me’gong 2025 kala don ruh ka jingpyninam ia ka kolshor kaba har rukom. Ki nongwankai kila iashimbynta ha ki jingialehkai tynrai kum ka Anding Oka, leit jngohkai ia ka Brew Village, VR Zone bad iadonbynta bad ki nongthain kti, nongshad bad ki nongiashimbynta ha ka kolshor ha kylleng ki rynsan.