Ka roi ka par ka la kylla ha Jylla katkum ka jingkhmih lynti ki paidhah, ong u CM

U Myntri Rangbah ka Jylla u Conrad K. Sangma hynne ka sngi, ula pynpaw ba ka la don ka jingkylla ba khraw ha ka jingkhmih lynti ki paidbah ha kylleng jong ka jylla, kaba kynthup naduh ki jingdawa ia ki jingdonkam kiba kongsan kum ki surok bad ka jingpynbiang ia ka umbam, sha ki jingangnud na ka bynta ki jingdonkam ha ki jingpule ha ki kyrdan kiba heh, ki jingtei kiba ia dei bad kane ka juk kaba mynta bad ban kyntiew ia ka rukom im jong ki paitbah. U Myntri Rangbah ka Jylla ula kren ia katei ha ka jingialang jong ka jingbuh mawnongrim jong ka Rymbai Government Higher Secondary School ha East Jaintia Hills. Ha kane ka jingialang la iadonlang u Myntri ka Pule Puthi u Bah Lahkmen Rymbui bad u MLA ka Khliehriat u Bah Kyrmen Shylla, ki heh ophisar sorkar kiba kynthup ia u Director of School Education & Literacy, u Deputy Commissioner, u Superintendent of Police bad ki nongialam na ki shnong bapher bapher.

U Conrad ula ong, ba kane ka jingkylla ha ka jingdawa ki shnong ki thaw ka dei kaba pyni shai kdar ia ka jingkiew ha ka jinglong jingman bad ka jingiaid shakhmat jong ka jingkylla kaba dang iaid ha ka jylla Meghalaya. “Haba lah pynbiang ia ki jingdonkam kiba kongsan, ki paitbah ki don shuh shuh ia ki jingangnud bad kadei thik kane kaba ngi lah sakhi ha kylleng ki bynta jong ka jylla” ula ong bad ka pynpaw ba ka sorkar ka iengskhem ha kaban jam shaphrang ban kyntiew ha ki liang ki bapher bapher. U Conrad ula pynkynmaw ruh ia ka por, ba ula leit ha ka sien kaba nyngkong eh ha Rymbai hadien ba ula shimti kum u Myntri Rangbah ha u snem 2020 bad ula sakhi ia ka jingsniew jong ki surok, ka jingsahkut jong ki skhim sam umbam umdih bad ka jingbym don ia ki jingtei kiba biang. Ula pynpaw ia ka jingsngewhun ban iohi mynta ia ka jingbiang jong ki surok, ka jingioh ia ka umbam bad ka roi ka par jong ki skul bad ula ong, watla ka lynti iaid nangne shakhmat ka long kaba jrong, hynrei ka jingkylla kala sdang. Ka Meghalaya kala iaid ha ka lynti kumba ki lah angnud.

Nalor kane ula kubur, ia ki jingtynjuh kiba la mad naduh u snem 2018, ka jingkyrduh pisa, ka jingbym bit bym biang ha ki tnad sorkar bad ka jingbym don ia ki jingtei kiba paka. Ula iaroh ruh ia ka shnong Rymbai kadei beit kaba iatylli bad kaba pynleit jingmut ha ki kam kiba iadei bad ka roi ka par bad ula ong ba ka long kaba dei hok ba ki nongialam ha ka shnong, ki khlieh nongsynshar, ki nongialam niam bad ki kynhun ki samla kin ioh ia ka jingiaroh.  Ka skul bad ka shnong kala aiti ia ka dorkhas ha kaba iadei bad ki jingtei kiba donkam, ban kyntiew ia ki Higher Secondary bad ban wanrah ia ki ‘Stream’ kiba thymmai ha ki jaka pule bad ha kaba iadei bad kine, u Conrad ula pynthikna ba ia baroh ki jingtyrwa yn sa khmih bniah bad ula pynthikna ba ka jingiakren ka lah dep sdang halor ka jingdonkam shuh shuh ia ki kamra klas na ka bynta ka Higher Secondary School bad kubur ia ka jingdawa ban wanrah bad ban sdnag noh ia ka Science bad Commerce Stream.