Palat 2 hajar ki skul ha Jylla, bun ki nonghikai ia ki khynnah skul ‘Ka sorkar kan hab ban pynbeit ryntih’

Ka Nartiang Presbyterian Higher Secondary School, Modop hynin ka sngi Baar, ka la pynhap pyrda noh ia ka jingrakhe ia ka Jubili Ksiar ne ka jingdap 50 snem jong kane ka skul ban ai jingnang jingstad ia ki khynnah. Ia kane ka jingrakhe ia ka jubili Ksiar la pynhap pyrda da u Myntri Rangbah ka jylla u Conrad K. Sangma kum u Kongsan ha ryngkat ka jingdonlang u Symbud Myntri Rangbah ka jylla u Bah Sniawbhalang Dhar, u CEM ka JHADC u Bah Thombor Shiwat, u Tbn. H. Khynriam u Chairman jong ka School Mananging Committee, ki nonghikai, khynnah skul bad kiwei kiwei.

U Conrad Sangma u la ong, ba kane ka skul ka la dap 50 snem ha ka jingiaid lynti ka jong ka bad kan dang iai bteng ban shakri shuh shuh ha ki snem ki ban dang wan bad u la iaroh bad pynpaw ia ka jingsngewnguh ia kane ka skul kaba la noh ia u synniang sha ka imlang sahlang.Nalor kane ula ong, ka sorkar ka la pynleit jingmut ha ka pule puthi bad ka la kyntiew ia ka mang tyngna na ka T.2000 klur sha ka T.3,500 klur kaba long ka mang tyngka baheh tam ha ka jylla.U Myntri Rangbah ula kubur ia ki jingeh ban pynbeit ryntih ia ki skul bad pynpaw ba ki don 206 ki skul ba biang ki nonghikai bad kumba 2,000 tylli ki skul ki don 5–7 ngut ki nonghikai na ka bynta tang iwei haduh 5 ngut ki khynnah skul bad ula ong, ba ka jingpynbeit ryntih ka long kaba kyllain namar ba bun ki shaniah ia ka jingkamai jakpoh lyngba kane ka kam.

U la ong, ba ka sorkar ka dang pynkhreh ban ai ia ka tulop kaba ryntih na ka bynta ki nonghikai Adhoc bad SSA, ka ban long ka jingshngain ia ka kam jong ki, ban pynkiew ka tulop bad ki jingmyntoi hadien ba ki la shongthait na ka kam bad ula khmih lynti ba ia kane ka rai yn sa shim ha shwa ka jingrakhe Khristmas. Ha kane ka sngi, la pyllait paitbah ia ka kot sahkynmaw ne ka Golden Jubilee Souvenir bad la pyniphuh iphieng ia kane ka jingrakhe lyngba ki jingrwai jingshad bapher ba la iashim bynta da ki khynnah skul bad u Myntri Rangbah ula pynbna ruh ban ai 20 Lak Tyngka na ka Chief Minister’s Special Development Fund ban shna pynheh ia kane ka skul.