Ka shnong Kdoh-hati, ka jaka teh hati ki Syiem hyndai

Ka shnong Kdoh-Hati ha Ri Bhoi District ka don ka khanatang kum kiwei ki shnong ha ri lum khasi ba pynlong ia katei ka shnong ban ai kyrteng Kdoh-hati haduh mynta. Katkum ka khanatang ki tymmen hyndai la iathuh ba katei ka shnong ka dei ka lynti iaid jong ki Syiem hima Khyrim hyndai haba ki leit ki wan da ki hati bad ki pynlong ka jaka sah miet ban shongjah thait bad ia u hati ki the ha uwei u maw ban yn um ioh shang makia bad kine ki maw ki dang don haduh mynta kiba ka shnong ka la ker bha ban lait na ka jingshah pynjulor.

U Bah Wanda Lawai u rangbah shnong barim ka Kdoh-hati, ula iathuh kitei ki maw la pynpra mynshwa hynrei ha ka por ba u long u rangbah shnong ula ker noh ban long ki maw sahnam kiba don la ka khana hyndai bad na liang ka shnong ka la mana ban pynjulor lai tylli kum ki maw byrsiew.“Ki don ki jingthoh ha kitei ki maw hynrei kim shai shuh mynta, namar ki nongialam shnong kim shimkhia ban pynkhuid bad pynshai ia katei ka jingthoh” ula ong u bah Lawai bad bynrap ki nongshong shnong mynta ki dei kiba wan na kiwei ki jaka kynthup u Kynriam, Pnar, Bhoi u War namar ki trai shnong ki la phet noh na Kdoh-hati sha Umlaiteng na ka daw ka jingiap briew ba shyrkhei ha u snem 1962 bad kane ka lah ban dei na ka jingduna  ki dawai dashin ha kito ki por.

U la ong ki nongshong shnong kumba long mynta ki im ha ka rep ka riang kum u kba, syieng, synsar, soh bad kiwei ban pyndap ia ki jingdonkam ha iing ha sem.