Ka Wah Rymben ha Lapalang ka jaka shangkai ba itynand ha Ri War

U Symbud Myntri Rangbah ka Jylla u Bah Prestone Tynsong uba long ruh u MLA ka Pynursla Constituency hynne ka sngi ula plie ia ka jaka jngohkai ha Lapalang-Wah Rymben. Ha shwa ban plie ia kane ka jaka jngohkai kaba la pyniaid da ka Dorbar Shnong Lapalang bad ka Lapalang Tourism Development Society la pynlong ia ka jingialang ha ka madan football Lapalang ha kaba la iadonlang ka MDC ka Nongshken ka Kong Grace Mary Kharpuri, ki heh ophisar ka tnad Tourism, ki riewrangbah ka thain, ki nongialam shnong bad ki paid nongshong shnong. U Bah Prestone ula pyllait paidbah ruh ia kawei ka kali ka ban lum bad kit ia ki niut ki nier ha ka shnong Lapalang kum shi bynta ban ialeh ban pynneh ia ka khuid ka suba ha kane ka shnong.

“Kane ka thain ka don ia ka shnong kaba khuid tam, ka um kaba sngur tam bad mynta ia ka wah kaba khuid tam bad kane kadei ka Wah Rymben kaba don ha ka shnong Lapalang” la ong u Bah Prestone.Ula kyntu ia ki paitbah ba kin long kiba iai shah ha kaba iadei bad ka jingshna ia ka surok Shillong-Dawki bad ula ong, shisien ba lah dep shna ia ka surok, ka jingwan tuid ki nongjngohkai kan jur bha ha kane ka thain ban ia ka thain Sohra bad ula kyntu ia ki paidbah ba kidei ban iatylli bad ban long kiba la pynkhreh ban pdiang sngewbha ia ki nongjngohkai bad ym dei ban shoh ne pyndik ia ki nongjngohkai. U Symbud Myntri Rangbah ula kyntu ia ki nongialam bad ia ki nongshong shnong ba kidei ban pyrkhat thymmai ban wanrah ia ki jingtei kiba bun ha ka thain khnang ba kan khring ia ki nongjngohkai ym tang ba kon shu wankai hynrei kin ioh ruh ban pynlut ia ka por ban sahkai ha kane ka shnong kaban long ka jingmyntoi ia ki nongshong shnong ban kamai kajih.

Ula pynshlur ba kidei ban shim ia ki skhim ka sorkar ban buh ia ki homestay namar na ka T.10 Lak, ka T.7 Lak kadei kaba la ai da ka sorkar bad T.3 Lak kadei kaba hap ban siew sha ka Bank.Hadien kane, u Bah Prestone ryngkat bad ki heh ki hain bad ki nongialam shnong kila iaid da ka kjat ban hiar sha Wah Rymben ha kaba kila sakhi ia ki dohkha kiba don ha kane ka wah kiba la ri bad sumar da ka shnong bad ula shong ruh da ka lieng ban peit ia ka jingitynnad jong kane ka wah bad ki sawdong sawkun jong kane ka jaka jngohkai baroh kawei.