Hiar u MR ha Ri Bhoi ban plie ia ka skul EMR ha Paham Syiem

U Myntri Rangbah Ka Jylla u Conrad K Sangma hynne ka sngi u la wan ban plie paidbah ïa ka Eklavya Model Residential Schools ba don ha ka shnong Pahamsyiem ba la sdang ruh ïa ka jingpynlong Klas (Academic session) ia ki khynnah kiba wan pule ha katei ka skulbah. Ha kane kajuh ka sngi, nalor ka jingplie paidbah ia katei ka skul, u Myntri Rangbah ula wan ban buh mawnongrim na ka bynta ban sdang noh ïa ka jingtei ïa ka Synthetic Athletes Track ka ban sa tei ha Madan jong ka Shnong Chinchona Pahamshyiem bad ha kajuh ka por ula buh ruh ïa u Mawnongrim na ka bynta ka jingtei ïa ka Convention Centre ban tei da ka sorkar ha ka Shnong Pahamsyiem.

Ha kane ka sngi kyrpang, la sakhi lang ruh da ka jingiadonlang u Myntri ka tnad pule puthi u Bah Lakmen Rymbui, u Myntri ka tnad ba dei peit ia ka kam ïakehkai u Bah Wailadmiki Shylla, u Myntri ka tnad ba peit ia ka tnad C&RD u Bah Sosthenes Sohtun, u MLA ka Nongpoh u Bah Mayral Born Syiem, ka MDC Nongpoh ka Kong Rona Khymdeit, u Deputy Commissioner ka Ri Bhoi u Abhilash Baranwal lem bad kiwei kiwei ki heh ophisar sorkar. La pynphuh pynphieng ruh ha kane ka sngi, da ki jingshad bad jingrwai ba la ia shimbynta daki khynnah skul ka Eklavya Model Residential School, Ka skul Alpha bad ki nongialam shnong, ki longkmie longkpa bad ki khun samla. Haba kren ha kane ka sngi kum u kongsan, u Myntri Rangbah ka jylla u Conrad K. Sangma u la ong, ba kine kiei kiei baroh ki dei ki jingangnud ba kum ka sorkar ka kwah ban kyntiew hapoh ka jylla kham tam hakaba ïadei bad ki kam ialehkai, ka pule puthi bad kiwei kiwei.

U la ong ruh, kane ka sorkar Ngam dei ka sorkar kaba kren tang daka ktien hynrei ka da peit ïaki jingeh bad ki jingdonkam jong ki paidbah bad ka pynpoi ruh ïaki jingdonkam jong ki. U Conrad Sangma u la ong ruh, Ka jingioh ban plie noh ïa kane ka skul Eklavya Model Residential Schools, ha Pahamsyiem kaba dei ruh ka nyngkong eh ha jylla kan long shisha ka jingmyntoi naka bynta ki Longiing kiba kwah ban phah pule iaki khun ki kti jong ki bad u la ong ruh, kumba la ioh ban buh mawnongrim ïaka Synthetic Athletes Track bad ïaka convention centre sa tang katno ki khun samla jong kane ka thain kin sa ioh ban pyndonkam ban ialehkai ha kane ka madan bad ban pyndonkam ia ka convention centre namar ba kane ka sorkar kam kut tang hakaba buh mawnongrim hynrei ka da pyndep ïa kaei kaei kaba la sdang.