Katba u Conrad u dang don ha shuki, ka sorkar kan ym kyndang

U Myntri Rangbah ka jylla u Conrad K Sagma hynne ka sngi ula ai ia ki kot pata sha ki 754 tylli ki Longiing na ki 8 tylli ki shnong ha sor Tura kiba shongwai ha ki jaka sorkar la bun phew snem. Ki paitbah kiba la ioh ia ki kot pata ki kynthup na ka Dakopgre Ronggi Songgital, ITI Upper Matchakolgre, Meghalaya Survey School, Sepoy Colony DC office, Deringgagre, Chinap Aslang bad Nikwatgre bad ka sorkar ka la ai haduh 452 bigha ka jaka sha kine ki longiing hapoh ka nongrim ba ki dei ki nongshong wai ha kitei ki jaka.Ha ka jingialang la donlang u Myntri ka Sorkar Jylla u Marcuise N Marak.

U Myntri Rangbah ula kyntu ia ki shnong ba kin pdiang ia ki kot pata bad ban pyndep ia ka jingsiew instalment. “Ngam pynbor iano iano ruh ban pdiang ia ka. Katba u Conrad u dang don ha ka shuki, ngin ym kyndang iano iano ruh. Hynrei nga khuslai ia kaei ka ban jia hadien jong nga. Kumta, haba ngi ai ia kum kane ka lad, ki paidbah ki dei ban shim kabu ia ka”. Ula pyntip ba kine ki kot pata ki dei kiba lah ban pynthymmai bad ka baiwai lah buh ha ka dor kaba rit bha bad ula pynbna ba ka Iingmane bad ka Lum Jingtep kin lait na ka jingsiew baiwai haba bthah ia u Deputy Commissioner ba un bud ia ki kyndon treikam ha ka jingai ia ki jaka ha kine ki shnong.

Nalor kane u Conrad ula jaw ummat, haba kynmaw ia ki jingpyrshang u Kpa jongu u P.A. Sangma bad ula ong, “U P.A Sangma ula pyrshang ban pynbeit ia kane ka kam. Kadei kaba la sahteng la slem bha bad kadei kaba u ju kren barabor. Kiei kine ki briew kiba sah ha ka jaka Sorkar? Ki dei ki briew jong ngi, bad ngi dei ban iarap ia ki”.Ula iathuh ba u Purno Sangma u ju hikai bad pynsngew ia ka thong ka jongu ba dei ban buh beit hakhmat eh ia ki paitbah.