Ki projek na ADB, PMGSY, DoNER, NEC yn pyntrei da ka ‘Package’ ong u Bah Prestone

U Symbud Myntri Rangbah ka Jylla, uba long ruh u Myntri ka tnat PWD (Roads) u Bah Prestone Tyngsong ula pynshai ba don katto katne ki project ba ym lah ban pynrit ia ka jingtrei (Package) namar hap bud ia ki jingbthah (Guidelines) ba wan na Asian Development Bank (ADB), Pradhan Mantri Gram Sadak Yojana (PMGSY), Development of North Eastern Region (DoNER) bad North Eastern Council (NEC). Ia kane u Bah Prestone ula pynshai hadien ka jingujor ki katto katne ki kynhun kontraktor kum ka Ri-Bhoi Government Contractor Association (RBGCA) bad kiwei kiwei.

U Bah Prestone ula ong, ba ka jingpyntrei ia ki project ne ki skhim jong ka ADB, PMGSY, DoNER bad NEC ki iaid da ka rukom Package ia kaba ka Sorkar Jylla kam donbor ban phiah lane ban pynrit. Ula ong ba kine ki projek ki dei ba ioh jingiarap na ki tyllong pisa kiba nabar ne na Sorkar Pdeng. “Ngi sngewthuh ia ka jingdonkam ban ioh kam ki Contractor trai Jylla hynrei nga iai ban ba ki Project ne skhim ba wan na ka ADB, PMGSY, DoNER bad NEC ngim lah ban phiah” la ong u Bah Prestone.

Halor ka jingdawa ban pynkylla ia ki guidelines ban ioh phiah ia ki package, u Symbud Myntri ula pynshai ba ka Sorkar Jylla ka la iakren bad ka Sorkar Pdeng. “Hynrei na ka liang ka Sorkar Pdeng ka la iathuh ba kan ym lah ban pynkylla ia kitei ki kyndon (Guidelines) ba la buh lypa” u la ong. Haba ia dei bad ka jingdonkam ban ai kam ia ki Contractor trai Jylla, u Bah Prestone u la ong ba ha ki snem ba la dep ka Sorkar ka la mang T.1500 klur na ka State Fund ban phiah ia ki skhim ban ai kam lang ia ki kontraktor trai Jylla.