Ka sorkar ka la phiel ban pynkynriah ia ki Kharmetor

Ka jingiakhih ban pynkynriah ia kiba sah ha Them Iewmawlong ba la tip kum ki Harijan, ka la iaid sha ka 7 snem kynthih naduh u snem 2018 hynrei kane kam pat urlong satia haduh kine ki sngi. Ka MDA-1 bad MDA-2, ka la kop ban pynkynriah noh ia kiba sah ha Them Iewmawlong hynrei kam shym la lah satia haduh kine ki sngi hadien ba kane ka kam ka la poi shaduh ka iing Kashari Meghalaya High Court. Ha kine ki snem, ka jingiapynbeit ka la iaid ha kaba ka sorkar jylla ka la pynkhreh ban shna 12 tylli ki jingtei ban don 30-40 tylli ki flat ia ki briew kiba sah ha them Iewmawlong kiba don kumba 342 ki longiing. Hynrei ki Harijan hapoh ka Harijan Panchayat Committee (HPC) ki la kyntait ia kane bad kila kwah ba ka sorkar ka dei ban ai jaka kaba kham heh kumba 200 square metre bad ka pisa sha kawei pa kawei ka longiing.  Ka Iing Kashari ka Meghalaya High Court, ka la kyntu ia kine ki ar liang mamla, kata ka sorkar jylla  bad ka Harijan Panchayat Committee ban iapynbeit halor kane.  Dang shen, ka sorkar jylla ka la iakren bad ka tnad iada ri ban ai jaka khnang ban pynkynriah ia kine ki briew na Them Iewmawlong bad kane ka ka kam, ka dang sahteng haduh mynta.

Haba iakren bad ki nongialam sengbhalang halor kane, kynthup u President ka Khasi Students Union (KSU) bah Lambokstarwell Marngar, u President ka Federation of Khasi-Jaintia and Garo Pepople (FKJGP) u bah Dundee Khongsit bad u President ka Hynniewtrep Youth Council (HYC) bah Roykupar Synrem, ki pynpaw shynna ka long ba ka sorkar jylla ka la phiel halor kane namar ba ka la kop shikop man ka por ban pynkynriah hynrei haduh mynta khlem pat poi shaei shaei ruh. Ha ka jingiakren bad u Nongialam ka HYC u bah Roy Kupar Synrem, ula ong kane ka mat ka dei kaba la slem bad kaba shu sahteng sah ha kaba mynta lei ka jingiakren hapdeng ka sorkar bad ki briew kiba sah ha them motor, kim poi shaei shaei bad ki mih pynban sa kiwei ki jingdawa jong ka jingbym hun jong kitei ki briew kiba sah beain ha katei ka jaka. U la ong ba ka jingbym lah ka sorkar ban pynkynriah, ka pyni ia ka jingtlot jong ki nongialam bad ka sorkar. “Ka seng ka pynrem ia kane ka jingbym lah ka sorkar ban pynkynriah tang ia ki nongtrei jong ka, kiba trei ha ki tnad sorkar,” ula ong. Ha kajuh ka por, ula ong ba ka jingbym lah ka sorkar ban pynkynriah ka dei namar ka jingtlot ka sorkar bad ka dei ruh ka jingai mon ia kine ki briew namar ban jied ia ka jaka. “Ha ka jingshisha ka dei ka sorkar ban ai da ka bor ne ka hukum ba kin mih na kane ka jaka bad kin leit sah ha ka jaka ba ka la pynkhreh. Hynrei ka jingtlot palat ka sorkar, ka shu pdiang beit ia ki jingdawa jong ki,” ula ong. Kaba kham i paw beit khamtam ia kane ka sorkar, ka long ba ka ai lad ia ki briew ba nabar ban wan tuklar, ha kaba wat tang ia ka jingialang ruh, ym lah ban iaid shakhmat lada kim don kita ki briew kiba nabar, ong u bah Roy.

“Jin da la dei ha kiwei ki jylla, ngam tharai ba ki briew kin ioh lad bad kane ka pynpaw biej bad ka pyni ia ka jingshah shilliang haduh ba ki leh mon bad ka pyni kumba ki pyniaid kine ki briew ia ka sorkar,” ong u bah Roy. Katba u nongialam ka FKJGP u bah Dundee ula ong ba kane ka ishu ka dei kaba la slem bah bad ka jingbym lah ban pynkynriah ia kine ki briew kiba sah beain ha them motor, ka dei namar ka jingkhein sting ka sorkar.U la ong haba ia dei bad kine ki briew khyllah jait, ka sorkar ka kham noh mynsiem namar lada ka mon, mardor ka la lah ban kyndang ia ki.“Ka jingpynlehroh ka sorkar bad ka jingjem ka sorkar, ka la pyllong ia kine ki briew ba kin shim kabu,” ong u bah Dundee.Katkum ka jingwad ka seng, kine ki briew kiba sah ha them motor ki dei kiba beain, namar ba ia ki nongtrei ka Municipal ka sorkar ka la pynshna ia ki ha Garo Lane, hyrnei kaba lyngoh ka long balei kim leit sah. “Kane ka pyni ia ka jingbym nud ka sorkar ban kyndang ia ki bad ka pyllong ia kine ki briew ban shim kabu haduh ba kim khih satia na katei ka jaka. U la kyntu ia ka sorkar ba ka dei ban shimkhia ban pynkynriah mardor ia ki briew kiba sah ha Them Motor, ha shwa ba ka jingiaishah ki sengbhalang kan kut.  U Nongialam ka KSU u bah Lambokstar ula ong ba ka por ka la dei ba ka sorkar kan pynkloi ban ai ka jubab ba shai la kan weng ia kitei ki briew, kumba ki paidbah ki thrang. U la ong ba ka jingpynslem ka wanrah ka jingartatien bad ka buh dak jingkylli ia kiba bun, la ka sorkar kam mon ban shimkhia ia kane ka kam namar ba shu pynkyllain na ka por sha ka por. Ha kajuh ka por, ula ong ba ka them motor ki mih ki nongshong nongsah ha katei ka jaka, dei namar tang na bynta ki nongtrei ka Municipal bad don ruh kiwei kiba trei ha ki tnad sorkar, hynrei ka dei ka kamram jong ki tnad ba kin pynbiang ia ka jaka sah. U la bynrap ba kane ka dei ka jingjem palat ka sorkar haduh ba ia kane ka mat, la wan mushlia naduh ki briew kiba na shabar ka jylla.“Lada ka sorkar ka don shisha ka jingthmu kaba khuid, kam dei ban pynsngap ia ka jingkwah jong ki briew ha them motor, hynrei ka dei ban iaid katkum ka ain bad ia ki nongsah beain dei ban weng jubor,” ong u Lambokstar.