Buh Mawnongrim u MR ban tei Meghalaya House thymmai ba T.22 klur ha Delhi

U Myntri Rangbah ka jylla u Conrad K. Sangma ryngkat u Symbud Myntri Rangbah u Bah Prestone Tynsong hynne ka sngi ki la buh ia u mawnongrim ban tei ia ka Meghalaya House Annexe ha 9, Dr. A.P.J. Abdul Kalam Road, New Delhi ha ka jinglut ba T.22 klur. Ha kane ka jingialang la iadonlang u Myntri ka Sorkar Jylla ba khmih ia ka tnad GAD u Bah Sosthenes Sohtun, u Chief Secretary u Dr. Shakil P. Ahammed, u Principal Secretary u Sampath Kumar bad kiwei. U Conrad Sangma ula ong, ka Meghalaya House ha Delhi ka dei ban ai jingshakri ia ki paitbah ka jylla ban pynthikna ka jaka ba sngain bad sngew tynnad ban pdiang ia ki nongwankai bad kumjuh ia ki ophisar.

U Myntri Rangbah ula ong, ba ka jingdon shuh shuh ki kamra sah kan iarap ha ban pynbiang ia ki paitbah na Meghalaya ba wan sha Delhi ban ia shim bynta ha ki jingialang bad iakhun eksamin, ki bynta ba ia dei bad ka koit ka khiah bad kiwei ki kam bad ula bthah ia ki ophisar ba ki dei ban pynthikna ba kane ka jingtei ba thymmai ka dei ban tei bha ban buh ha khmat ia ki jingdonkam bad ia ki tiar katkum kane ka juk ba mynta. U la ong ruh, ba ka Meghalaya House ka dei ban kylla long ba nyngkong eh, ba ki nongshong shnong ka jylla kin jied haba ki wan sah ha Delhi bad tang shu dep shna ia ki 24 tylli ki kamra sah, kan iarap shibun ban kyntiew ban pynbiang ia ki jaka sah kiba wan na Meghalaya bad la khmih lynti ba yn pyndep kloi ia kane ka projek. U Myntri Rangbah ula ong, ba kane ka jingtei kadei ban long kaba donnam bad ban pyni ia ka kolshor bad ia ka riti dustur jong ki paitbah ka Meghalaya.

“Tang ka jingshna ia ka jingtei kaba thymmai kam pat biang. Ka bynta jong ki briew ruh ka long kaba kongsan bha. Ka jingrkhie, ka jingpdiang da kaba sngewbha ia kiba wan sha Delhi ha ka sien kaba nyngkong na Meghalaya ka lah ban wanrah ia ka jingiapher haba ki sah hapoh jongka Meghalaya House,” ula ong. Ia kane ka jingtei ba thymmai un tei ha ki artylli ki wat, ha ka wat kaba nyngkong kan kynthup ia 24 tylli ki Guest Rooms ne kamra sah ryngkat bad kawei ka jaka pynlong jingialang ne Meeting Hall bad yn tei ha ka jinglut jingsep ba kot T.22 klur bad ia kane kan dei kaba la tei ha ka jaka ba don ka Meghalaya House complex ba rim kaba la tei naduh u snem 1971 ha ka jaka ba don 1.99 akar.