Yn buh kamera CCTV sa 20 tylli ki shnonng nalor ka Mawlai Mawroh

U Myntri Rangbah ka Jylla u Conrad K. Sangma hynne ka sngi ula plie ia ka jingpynitynnad bad ia ki kor CCTV ha shnong Mawlai Mawroh. U Myntri Rangbah ula sam ruh ia ki song jingiarap sha ki shnong ban pynitynnad ia ki shnong ki thaw, ha kaba la ia donlang u Chief Secretary u Dr Shakil P Ahammad, u Director jong ka Urban Affairs bad u CEO ka Shillong Municipal Board u P K Boro ki nongialam shnong bad kiwei.

U Conrad ula ong, ba ka long ba kongsan ia ki shnong ki thaw bad ia ka sorkar ban iatreilang ban wanrah ia ka jingkylla kaba iar bad kaban sakhi da baroh bad ka jingpynitynand ia ka sor ka dei ka jingbteng jong ka jingpyrshang ka sorkar jylla lyngba ka tnad Urban Affairs bad Municipal ban pynlong ia ka nongbah bad ki jaka khapsor kiba khuid, jyrngam, shngain bad kiba itynnad. U la pynpaw ia ka jingkmen ban iohi ba kane ka jingpyrshang ka la iaid ha ka lynti kaba dei, da ka jingiashim bynta lang jong ki shnong ki thaw bad ka imlang sahlang.

U la pyntip ba na ki 45 tylli ki shnong kiba la dep ban ithuh ha ka wat kaba nyngkong ban pyndait ia ki kor CCTV, kumta 25 tylli ki shnong ki dei kiba la dep ban pyndait ia ki CCTV bad sa 20 tylli ki shnong kin sa pyndep noh shen ia kane ka kam bad ula ong ba ka jingpyndait ia ki CCTV bad Street Lights ne Post Elektrik ka dei ka kam kaba dang iaid shakhmat bad yn sa kynthup shuh shuh ia ki shnong ha katei ka wat ka baar. Hadien kane, u Myntri Rangbah la leit ruh ban jngoh ia ka shnong Mawlai Iewrynghep.