Ka jingiaid lynti ka Seng Samla Pynthorumkhrah Parish ha ki 50 snem ka pyni ia ka jingkiew bad jingroi

Ka Seng Samla Pynthorumkhrah Parish, St. Peter & Paul, hynne ka sngi, ka la pynhap pyrda noh ia ka jingrakhe ia ka Jubili Ksiar ne ka jingdap 50 snem naduh ba la seng ia ka ha u snem 1975.Ha ka sngi pynhap pyrda ia ka jubili ksiar, la sdang ia ka prokram da ka Holy Mass kaba la pyniaid da u Most Rev. Bernard Laloo, Bishop jongka Diocese of Shillong, ha ryngkat ka jingdonlang u Parish Priest u Fr. Lawrence L.Nongkseh bad u Fr. Festus Shadap uba long u Assistant Parish Priest.
La pyllait paidbah ruh ia ka Golden Jubilee Souvenir da u Bishop Bernard Laloo ha kaba la iadonlang u MLA ka Pynthorumkhrah Constituency u Bah A.L. Hek bad la pynkut ia kane ka jingrakhe ia ka jubili ksiar da kaba pynhap ia ka lama da u Fr. Festus Shadap.Ka Seng Samla ka la pynkup burom ruh ia ki nongialam ki barim kiba la noh synniang bha ia ka seng, kynthup lang ia ka Uni Mary Kharkongor kaba la thaw ia ka Anthem jong ka Seng Samla bad Bah Dominik K. Lanong, uba la thaw ia ka riti treikam jong ka seng.U Bishop Bernard Laloo ula kyntu ia ki samla ba kin im ia ka jingim kaba khuid bad ban long kiba la pynkhreh bad ula pynkynmaw ia ki jingiai bteng ban iakhun ia ki bor jong ka jingsniew, kiba pyrshang ban pynjot ia ka jingim jong ki samla bad ula pynshlur ia ki ba kin heh kin san da kaba iajan bha bad u trai Jisu Khrist bad ban tei ia ka jingiatylli bad ka jinglong kawei ha ka jingngeit.Ka Jubili Ksiar ka dei ka jingiaid lynti jong ka Seng Samla naduh ba lah seng ia ka ha u snem 1975, kaba pyni ia ka jingkiew bad jingroi ha kine ki phew snem kiba la leit noh, ka jingwanrah ia ka jingkylla, ki jingtynjuh bad ka jingiaid shaphrang katkum ka jingiaid ka juk mynta la bun phew snem.
Ha ki snem 1975, 1980 bad 1990, ka Seng Samla ka la sakhi ia ka jingkiew suki lyngba ka jingwan iashim bynta ki samla kiba la nang la stad bad kiba don ia ka jingkitkhlieh ban pynkhlain ia ka jinglong nongialam bad ban tei ia ka seng hapoh jong ka Parish bad ha ka imlang sahlang.Ha shwa ban pynkut ia kane ka jingrakhe, la pynlong ruh ia ka prokram kaba ia dei bad ka kolshor ha kaba la ioh ia ki jingrwai, jingshad bad ka jingak drama da ki dkhot ki barim jong ka Seng Samla kaba batai shaphang ka jingiaid lynti jong ka Seng Samla wat hapdeng ka jingmad ia kiba bun ki jingtynjuh.