Pyrshah jur ka Ri Bhoi District Congres Committee ïa ka VB-G RAM G

Ki nongialam ka Ri Bhoi District Congres Committee (RBDCC) ha ka jingiabud ryntih bad ka Meghalaya Pradesh Congress Committee (MPCC) ki la sdang ia ka jingmih shakhmat ban pynpaw ia ka jingpyrshah kaba jur ia ka jingpynkylla kyrteng ia ka skhim MGREGA 2005 ban pynlong aiñ jubor jong party BJP ia ka VB-G RAM G Act 2025 kaba la ktah ia ka ri hi baroh kawei na ka jingpynkylla ia ki rukom treikam jong ka skhim MGREGA.
Ha ka jingialang kaba la long mynta ka sngi ha Mawdiangum, na ka liang ka RBDCC ba la lamkhmat da u Bah Rocky Marwein, Adhoc President la donlang ruh u Bah Jonathan Syiem, Vice President ka Meghalaya Youth Congress nalor kiwei kiwei ki nongkitkam ka RBDCC.
Haba kren sha ki Nongthoh Khubor, ki Nongialam ki la pynpaw ba hadien ka jingialang kaba kyrkieh kaba la long ha ka 8 tarik Kyllalyngkot ha Congress Bhavan, na ka liang ka MPCC ka la rai kyrkieh ban snohktilang ia ka rai jong ka All India Congress Committee (AICC) ban sdang ia ka program MGNREGA Bachoa Sangram ban pyrshah jur ia ka jingleh donbok jong ka party BJP ymtang ban pynkylla kyrteng ia ka skhim MGREGA hynrei wat ban pynkylla ia ki rukom pyntreikam ia kane ka skhim 100 sngi ha ka ri hi baroh kawei lyngba ka skhim kaba ki la jer kum ka VB-G RAM G Act.
Ki la pynpaw ruh, ba ka jingpynkylla ia ka rukom treikam jong kane ka skhim ka la ktah shikatdei ia ki paidbah ka ri hi baroh kawei khamtam kito ki Shnong nongkyndong kiba la ioh jingmyntoi shikatdei eh ban pynroi pynpar ia la ki Shnong ki thaw naduh u snem 2005 terter tad haduh 2014 ba la sdang mushlia ka party BJP ia ka jingpyntreikam jong ka skhim MGREGA, ki la bynrap ba mynshwa ka pisa ka poi beit sha ki Village Employment Council (VEC) hynrei mynta ka rukom treikam ka la kylla bad bun ki Shnong ki thaw ki la hap ban kit ram khamtam ka bai material bad ki jingioh jong ki paidbah.
Ki la pynpaw ruh, ba ka jingtreikam jong kane ka skhim thymmai ka la nang pynhiar shuh shuh ia ka jingmang pisa sha ki Shnong ki thaw khamtam ha North East India bad ki paidbah mynta haba ki donkam ia ka kam kin hap ban shondur hashwa ban pyntreikam bad da la dep trei, ka jing hap ban register bad pyniasoh ia ki Adhar card jong ki bad kata ka online link kaba la buh jingeh shikatdei ia ki paidbah khamtam ha ki Shnong nongkyndong.
“Ka party Congress ka dawa na ka sorkar BJP ba ka dei ban pynlait noh shwa ia baroh ki ram ba la sah da ki Shnong ki thaw mynta la bun bun snem hashwa ba kan pyntreikam ia ka skhim thymmai bad ka seng Congress kan nym randien ban iakhih wat haduh da donkam wat ban leh da ka state protest ruh”, ong ki nongialam da kaba khot wer ia ki Dorbar Shnong bad ki paidbah ban iatreilang ban pyrshah ia kane ka skhim iakjakor jong ka BJP.