Iasoi ka MoU ka Meghalaya bad Nepal ban iatreilang ban kyntiew ia ka jingstad

Ka Meghalaya Basin Development Authority (MBDA) bad ka International Centre for Integrated Mountain Development (ICIMOD) hynne ka sngi ki la pynlong ia ka International Conference Baar sngi halor ka mat “Scaling Nature-based Solutions for Himalayan Resilience” ha nongbah Shillong.Ha kane ka sngi sdang ka jingialang la iasoi ia ka Memorandum of Understanding (MoU) hapdeng ka Meghalaya bad Nepal ban kyntiew ia ka jingiatreilang bad ban ia sam mar kylliang ia ki jingnang jingtip ba iadei bad ka Nature-based Solutions and Mountain Resilience.Haba kren ha ka jingialang u Chief Secretary ka Jylla u Dr. Shakil P. Ahammed, ula ban jur ia ka jingkongsan ban pynneh pynsah ia ka mariang bad ia ka jingshimkhia ban iada ia ka imlang sahlang pynneh ia ka mariang hapoh ka jylla Meghalaya bad la pynpaw ka jingialam ban iada ia ka mariang ka dei kaba la ngam jylliew ha ka kolshor bad ka riti dustur jylla Meghalaya bad wat ha ka kam synshar khaddar. 

U la ong, ka Meghalaya kadei ka jylla kaba jyrngam bha hapoh ka ri, ha kaba bun ki khlaw ki btap kidei kiba hap hapoh ka jingkhmih jong ki shnong ki thaw, kynthup ia ki Law Kyntang, ka jingiada ia ki um ki wah bad ia ki dohkha da ki shnong ki thaw kaba kyrshan ia ka sawdong sawkun jong ka mei mariang bad ia ka kamai kajih.U Chief Secretary ula pynpaw, ba ka dei ka jingleh tynrai kum ka jingthaiñ ia ka Jingkieng Jri bad ka rukom thaiñ da kaba kyllaiñ bad pyniasohlang ia ki thied jong ki dieng ban kylla sha ka jingkieng ka long ka shap kaba khlaiñ jong ka jingpyniasoh lang ia ki pateng ha ka jingdon ia ka jingkitkhlieh na ka bynta ka sawdong sawkun jong ka mei mariang bad kane ka jingpynneh pynsah kadei ban pynleit jingmut ha kaban lum lang ia ki jingdon jingem na ka bynta ki pateng ban dang wan.U la ong, wat hapdeng jong ka jingjur slap, hynrei ka jylla ka ju mad ruh ia ka jingkyrduh um namar ka jinglong riat jong ki jaka ha kaba ka um kala tuid lut shapoh bad ula pynpaw ba ka jylla kala sdang ia ka Integrated Policies & Programmes kaba kynthup ia ka Water Resource Management, ka jingiada ia ki khlaw ki btap, ka jingrep khlem ber dawai ne Organic Farming, ka jingioh ia ka bording elektrik.

Lyngba kane ka jingialang la lum lang ia baroh ki nongthaw ia ki polisi treikam, ki nonghikai kiba shemphang, ki nongwad bniah, ki nongmihkhmat na ki karkhana shimet, ki samla bad ki nongialam shnong na kylleng ki bynta jong ka Indian Himalayan Region (IHR) bad ka jingiar jong ka thain Hindu Kush Himalaya. Ka Nature-based Solutions (NbS) ka dei ka bynta kaba la kiew ha ka jingioh jingithuh ha ka pyrthei baroh kawei, kum ka lad ban shimkhia ia ka jingkylla ka suin bneng, ka jingpynneh pynsah ia ki jait jingim bad ki jingthaw bapher bapher bad ka jingiaid ka roi ka par ryngkat bad ka jingiada ia ka mariang.