Kiba don ha kiwei ki jingngeit ruh ki wan kiew u Lumsohpetbneng

Ki Paidbah kiba dang don ha ka niam Khasi tynrai hynne ka sngi kila leit ban kiew pyneh rngiew sha u Lum Sohpetbneng.Ha kane ka sngi ha shwa ban kiew pyneh rngiew, ka la don shwa ka jinglehniam ha ka khyrdop ha ka por 6 baje mynstep bad la bud pat ka jinglehniam ha duwan ba la pyndep da ka Kyhun ki Tymmen ki San jong ka Seng Khasi Kmie. Kane ka jingkiew Lum Sohpetbneng ka long na bynta ban pyneh rngiew ban pyneh ia ka bok, ban koit ban khiah bad ban bit ban biang.Haba kren halor kane, u Rangbah I Sun, u chairman ka Lumsohpetbneng Committee ula ong ba u Lum Sohpetbneng u dei uba khampher napdeng ki lum baroh ha ka ri Khasi-Jaintia namar ba u dei u lum sohpet kur sohpet kha, u lum uba kyntang tam.

“U Lumsohpetbneng u dei uba khampher tam uba kyntang tam, u dei u lum sohpet kur sohpet kha. Ka jingkiew pyneh rngiew ka dei ban pyneh ia ka rngiew ka rwiang, ka bok ka nusip, ban iabit ia biang ha ka longbriew manbriew, ha ka koit ka khiah bad ha ki kam ki jam. Ngi la ai ruh ia ka nguh ka dem ia u Kynrad ban theh sei ia ngi”, la ong u Rangbah I. Sun.U la ong ba ki briew ki ioh ruh ba shim ia u khaw bad ka um ksiar um rupa ba la duwai ban eh ka bok ka rwiang ban lait na kano kano ka jingsniew.

U Rangbah I. Sun u la ong ba kane ka jaka ka dei ka jaka ba u blei u don ha katei ka jaka ha kaba ki paidbah kila wan ban ainguh aidem.Ha kajuh ka por, ula ong ba kiwei kiba don ha kiwei ki jingngeit ruh ki ju wan ban peit ban sakhi ia kane ka jaka u Lumsohpetbneng, bad kane ka pyni ba ki sngewthuh ba ka jaka ka dei kaba don ki blei, kaba kyntang.Ha kane ka sngi, kumba ju long la pyllong ia ka jingknia  jingkhriam da ki riew tymmen riewsan bad ka jingpyni riti ruh ha madan ha kliar u Lumsohpetbneng.