Pynlong Exhibition ka tnad DCIC ban kyntiew ïa ki nongseng kam lajong

Ka long shisha ka jingai mynsiem ban wanrah ia ka rynsan pyninam ia ki tiar ba la shna hi kum ka lad aikam aijam ia ki nongseng kam lajong, ha kaba mynta ka sngi, ka tnad treikam jong ka General Manager ka District Commerce & Industries Centre, Ri Bhoi District ka la plie ia ka pyninam kaba la tip kum ka 29 District Level Industrial Exhibition 2026 ba madan NSCA, Pahamsyiem.

Lyngba kane ka Exhibition ki nongseng kam lajong kiba na kylleng ka Ri Bhoi District ki la wan ban iashimbynta ban pyni ia u soh jong ka kam ba ki la treishitom baroh shikatta ban ioh ia ka lad pat ban die sha ki paidbah lyngba kane ka rynsan.

La wan ban plie ia kane ka iew pyninam da u Bah Mayral Born Syiem, MLA ka Nongpoh Constituency kum u kongsan ha ka jingiadonlang ka Kong Balakyntiew Rani, ADC ka Ri Bhoi District, u N Upadhya, Additional SP ka district, u Bah GFW Pariat, General Manager ka DCIC nalor kiwei kiwei ki heh ophisar na ki tnad treikam sorkar.

Haba kren ha kane ka sngi, u Bah Mayral Born Syiem, u la pynpaw ia ka jingkmen ban iohi ia ka jingwan tuid jong ki nongseng kam lajong sha kane ka iew pyninam bad ai jingiaroh ia ka tnad DCIC kaba la shimkhia ban pynlong kum kine ki iew pyninam kaba long ruh ka lad ban kyntiew ia ka ioh ka kot jong kito ki nongseng kam lajong kiba treishitom ban ieng ha la ki kjat na kylleng ka Ri Bhoi District.

U la ong ruh, ba ka tnad DCIC ka dei kawei na ki tnad treikam sorkar jylla kaba don ia ka bynta kaba khraw ban kyntiew ia ka lad sengkam sengjam Lajong da kaba kyrshan ruh ia kito kiba angnud ban sengkam lyngba ki skhim bapher bapher, hynrei u la kyntu pat ia baroh ba ki dei ban treishitom ha kino kino ki kam kaba ki nongseng kam ki seng da ka jingangnud ruh ban kiew ha ka ioh ka kot ha kita ki kam kiba ki trei.