Phah tuklar u MP ia u Lat ban wanrah ka shong suk shongsain ha Garo Hills

U Member of Parliament (MP) Lok Sabha ka Tura Parliamentary Seat u Saleng Sangma hynne ka sngi ula kynduh ia u Lat ka Jylla u CH Vijayashankar ban phah tuklar lem halor ka jingiakynad kaba dang iai bteng ha rilum Garo Hills.

Haba kren sha ki lad pathai khubor u Saleng ula iathuh ba ha ka jingiakynduh ia u Lat, ula iakren halor ka khyrnit ba hynriew bad halor ka jingioh lad ki phetwir Rhonghiya ban rung shapoh ka Jylla Meghalaya bad ka thain Shathei Lammihngi (North East).

U Saleng ula iathuh ba ka la don ka jingiakren ba jrong bha bad u Lat ban iathir ia ki sienjam ba ka Sorkar Jylla ka donkam ban shim na ka bynta ban wanrah biang ka shongsuk shong shngain hapoh rilum Garo.

Ula iathuh ka don ka jingiakren sani bha haba ia dei bad ka jingdonkam ban pynsngewthuh ia ki samla kiba dang iai bteng ban iakhih ha rilum Garo.

“Haka jingiakren nga ka kyntu ia u Lat ka Jylla ban bthah ia ka Sorkar Jylla ban pynbun ia ki lad jingiada ha ki jaka ba don ka jingiakynad ban iada ia ki riewlum bad ban pynthikna ba iaka hok ba la ai ia ki riewlum, kam dei ban shah knieh noh” la ong u Saleng.

Haba kylli halor ka jinglong jingman, u MP ula ula iathuh ha ka jinglong jingman mynta ha Garo Hills ka la sdang wan phai biang sha ka suk ka sain lyngba ka jingiatreilang jong baroh.

“Nga ai khublei ia ki bor District, ki bor pulit, bad baroh ki tnat treikam Sorkar kiba la lah ban tem ia ka jingiakynad da ka rukom kaba dei bad kito kiba la iadon bynta ha ka jingwanrah ia ka suk ka sain hapoh ka thain. Nga ai khublei ki nongialam niam bapher bapher kiba la buh jingduwai na ka bynta ka suk ka sain” ula ong.