Ka JHADC ka don ha ka jingma kum ban khyllem ne duh syndon

U MDC liang pyrshah ka JHADC na ka party congress u Madonbai Rymbai haba kren sha ki lad pathai khubor ula pynpaw ka jingbynñiaw halor ka jinglong jingman ka JHADC da kaba ong ba mynta kane ka council ka la mad ia ki jingeh bakhraw na ka jingkyrduh pisa bad kaba ma tam i kumba kan khyllem ne kut syndon.Kine kiei kiei baroh ki jia u ong dei namar ba ka executive committee kam shym la shimkhia ban wad ki lad ki lynti kumno ban kyntiew iaka pla tyngka ka council, ha kaba wat iaki jaka pynmih pisa bala don lypa ruh  ym ithuh ithaw ka rukom pyniaid bad ruh ym iohi iaka jingiohnong ka council.U ong haba iadei bad ki jingdon jong ki cement plant hapoh East Jaiñtia Hills ba pyniaid daki bar Jylla ruh ym shem la iohi ba ka council ka ioh iaki khajna wat haba ka aiñ lyngba ka regulation 1954 ka la batai shai ba iaki bar Jylla lada ki shu die wai dong ruh ki hap siew khajna shaka District Council hynrei pynban kat ka cement plant baheh kaba hap hapoh u pud ka JHADC ruh ym iohi ba kan pynmyntoi iaka Council.

Nangta u ong wat  ka jingdon ki iew ki hat kiba pynlong iew manla ka sngi, kiba pynlong shisien shi taiew ruh ym iohi iaka jingiohnong ka council lada dei iaki iew ba don ha East Jaiñtia bad West Jaiñtia.”Mynta la shisnem ba nga long biang kum u MDC ngam iohi soh sla ei ei naka jingiohlum khajna, kumno hi ban ym mad ia kine ki jingeh, ba ha ka jingshisha ka jingiohlum khajna ka dei ban nangkiew nangkiew, pynban la nangkiew nangkiew da ka jinghiran pisa, bad kane ka buh jingma ia ka lawei ka Council”. Ong u MB Rymbai.Halor kat kine ki jingeh u MB Rymbai u kyntu iaka EC ban wad lad naka central skhim, namar ba ma u ruh ha ka por ba u long CEM ha u 2018 ula wanrah palat 18 klur ka pisa na ka central skhim tangba u shah rem noh ha u 2019 kumta um ioh lad shuh ban leh bha ia kaba u mut u mang.

Ula ai jingmut iaka EC ba kan thaw ki lad pynmih pisa lyngba ka Myrkeiñ Protected Forest kaba don hajan shnong Jaraiñ ka lynti ban leit sha Dawki namar kane ka jaka dei kaba lah ban wanrah ki project pynmih pisa iaka council haba iadei bad ki kam jngohkai kumba kane ka thaiñ ruh dei kaba khring bha iaki nongjngohkai pyrthei.Ka council lyngba ka forest department u ong ka don iaka beat office, protected forest nursery, tree plantation, ia kane ruh ym iohi ba kin leh ei ei, nalor ba iaki beat office la ai wai shaki riew shimet.Halor ka jingai wai iiaki beat office u ong  jingshisha katkum ka regulation 1959 iaki beat office ym lah ban aiwai namar lada buh daki briew bym don ka jingnang jingtip (untrained) ha kane ka kam kumno kin lah pyniaid iaka kam.