Plie u Lat ia ka Credit Seminar NABARD

Vijayashankar hynne ka sngi ula plie ia ka Credit Seminar kaba la pynlong da ka National Bank for Agriculture and Rural Development (NABARD), Meghalaya Regional Office.Ha kane ka jingialang la wan ban iadonlang u Principal Secretary u Lat u H.C. Chaudhary, Kong Joan R Blah, General Manager ka NABARD, u Swapnil Tembe, Secretary ka Tnad Pla Tyngka ka jylla, ki nongmihkhmat na ka Reserve Bank of India, State Bank India, ki heh ophisar ka sorkar Meghalaya bad kiwei kiwei.Ha kane ka jingialang u Lat ka jylla ula pyllait paitbah ruh ia ka State Focus Paper 2026-27 kaba dei ka kot kaba kongsan kaba khmih bniah ia ka jinglah bor ban shim ia ka pisa ne ‘credit potential’ ha ka liang ka rep ka riang ne kiwei pat ki bynta, ki karkhana rit bad kiwei ki tnad kiba kongsan ha ka jylla.

U Lat ula aiti ruh ia ki jingthoh sha ki kynhun kiba lah ban pyntreikam ia ki projek ki bapher bapher.Haba kren ha ka jingialang u Lat ula ai jingiaroh ia ka NABARD kaba la pynlong ia kane ka seminar man la ka snem, da kaba wanrah lang ia baroh ki briew kiba donbynta ha ka kam na ka liang ka sorkar, ki bank bad ki kynhun kiba kyntiew ia ka roi ka par ban iatai ha kaban pynkhlain ia ka jingioh ia ka pisa ka tyngka ha ki tnad kiba kongsan bad ban kyntiew ia ka roi ka par ha ki thain nongkyndong.Ula pynpaw ia ka jingkyrmen ba ka State Focus Paper kan ai iaki jingtip kiba kordor bad ia ki jingtip kiba lah ban leh ban btin ia ki kynhun bei tyngka bad ki nongthaw polisi ha kaban kyrshan ia ka jingkiew ka ioh ka kot ha ka ki thaiñ nongkyndong jongka Meghalaya bad ula pyntip ba ka rep ka riang kala iai bteng ban long u budlum jong ka ioh ka kot ha ka jylla Meghalaya bad bun na ki nongshong shnong kidei kiba shaniah ha ka rep ka riang bad kiwei kiwei ki kam ban kamai jakpoh.

U Lat ula ban jur ruh ia ka jingiohi jngai jongka Viksit Bharat @2047 bad ong ba ka jingpynkhlain ia ka rep ka riang, ka jingioh ia ka pisa ka tyngka bad ban pynkupbor ia ki nongrep kiba rit ka long kaba kongsan bha ban don ia ka jingkyntiew kaba iai neh bad kaba salonsar.Ula banjur ia ka jingdonkam ban pynthikna ba ki jingdon jingem kiba riewspah jong ka thain shatei lammihngi dei ban pyndonkam da ka lynti katkum ka jingstad saian bad ha ka lynti ban pynneh pynsah ia ka jinglong jingman jong ka sawdong sawkun jong ka mariang bad ula pynshlur ia ki nongrep ba kidei ban rep ban riang khlem da pyndonkam da ki dawai, ia kaba ka jylla Meghalaya ka lah bha ban kiew shaphrang.U Lat ula pynpaw ruh ia ka jingkongsan ban kyntiew ia ki karkhana kiba rit, ban pynkhlain ia ki kynhun Cooperative bad ban pynkup bor ia ki longkmie lyngba ki Self Help Groups.