Ka High-Speed Corridor ka jingkyrkhu ia ka Meghalaya khamtam ka Ri-lum Jaintia

U MLA ka UDP na Khliehriat constituency u Bah Kyrmen Shylla ula ong ba ka projek High-Speed Corridor kan long ka jingkyrkhu ia ka Jylla Meghalaya baroh kawei khamtam ia ka ri-lum Jaintia.

Haba kren shaki lad pathai khubor u Bah kyrmen ula ong ba kane ka projek kan pynsuk ïa ka leit ka wan, kan pynduna ïa ka por leit jingleit, bad kan pynduna ïa ka jingdheng kali ha kylleng ka East Jaiñtia Hills bad shabar jong ka.

“Haba phai sha ka High Speed Corridor, kane kam dei tang na ka bynta ka East Jaiñtia Hills marwei, ka long na ka bynta ka ri baroh kawei” la ong u Bah Kyrmen.

“Ban don ïa ka High Speed Corridor kaba iaid lyngba ka East Jaiñtia Hills ka long ka jingkyrkhu kaba khraw ïa ki paidbah jong nga bad ïa ki paidbah ka Ri Jaiñtia. Kano kano ka jaka ba ka project ka iiad lynti, kan dei ka jingkyrkhu ia kito ki jaka namar kane kan pynsuk ia ka leit la wan, pynduna ia ka por leit jingleit bad khamtam eh kan wanrah ia shibun ki jingkylla” ula ong.

U la kdew sha ki jingduna jong ki surok kiba don mynta. “Ka surok kaba don mynta ka long kaba rit bad kaba khim. Da kaba don ïa High Speed Corridor, kan pynduna ïa ka jingdheng kali. Na ka bynta ki nongleit nongwan kiba wan sha Shillong bad ri-lum Jaiñtia, kan long kaba suk bad kaba stet bha,” u la ong.

“Kata kan long ka jingnoh synñiang kaba khraw bha ia ki paidbah ka Jylla” ula ong.

Halor ka kam thied jaka, u Bah Kyrmen u la ong ba ka Sorkar kala kut jingmut ban ïada ïa ki hok jong ki nongshong shnong.

“Haba ïadei bad ka bai lutksan na ka bynta ka jaka bad baroh, kata ka dei ka jingkular jong ka tnat bad ka sorkar ba ym dei ban knieh ïa ki hok jong ki paidbah. Ki dei ban ïoh ia baroh ka pisa kaba dei ka hok jong ki,” u la ong.