Dawa ki sengbhalang ban pyndam noh ia ka SAI Computer Pvt. Ltd ban sam bording ha thain Mawsynram

Ki kynhun sengbhalang jong ka thain Mawsynram C&RD Block hynne ki la leit iakynduh ia u Myntri ka tnad Bording ka jylla u bah Metbah Lyngdoh ban dawa ba ka sorkar jylla ka dei ban pyndam noh mardor ia ka SAI Computer Pvt. Ltd ban pyniaid ia ki kam bording ha thain Mawsynram – Ranikor.Kine ki kynhun sengbhalang kiba kynthup ka Federation of Khasi Jaintia & Garo People (FKJGP), Hynniewtrep Youth Council (HYC) bad ka Hynniewtrep National Youth Front (HNYF), ki la ai por ruh ar taiew ia ka sorkar jylla ba kadei ban pyndam noh ia kane ka kompeni bad la byrngem ba lada ka sorkar kam sngap ia ka jingdawa, kin sa wan ban tur paidbah da ki hajar ngut ki paidbah ha Nongbah Shillong.

Ha shwa kane, ki kynhun sengbhalang hynne ka step Lah Sngi u Blei kila leit tur bad rah plakad hakhmat iing jong u Myntri ka tnad Bording ban pynpaw ia ka jingbitar halor ka jingaiti ka sorkar sha ka SAI Computer Pvt. Ltd ban sam bording ha Mawsynram bad Ranikor.

Haba kren sha ki lad pathai khubor u Chairman ka kynhun sengbhalang u bah Tynshain Ronghang ula ong ba ha ka jingiakynduh ia u Myntri kila pynpaw ia kita ki jingeh kaba u paidbah u iakynduh naduh ba ka sorkar ka aiti ban pyniaid bording sha katei ka kompeni.

Ula ong ba kum ki paidbah kiba thang bording kila iakynduh jingeh namar ka jingkiew ka bai thang bording ka la long palat pud bad bun ki paidbah kiba duk kim lah shuh ban siew ia ka bai thang bording.

“ Ngi la dawa ba ka sorkar kadei ban pyndam noh mardor ia ka soskular bad kane ka kompeni namar ba ngim lah shah ia ka jingleh donbor kane ka kompeni haba iadei bad ka jingkiew ka bai bording,” ong u bah Tyngshain.

Katkum ka jingong ki nongialam, na ka liang jong u Myntri ka tnad Bording ula kular ba un sa shimkhia bad un sa iakren ban pynbeit bad u Myntri Rangbah ka jylla u Conrad K. Sangma ynda u la wan phai na Delhi.