Ther ka Hima Sohra ia u Bah Ardent ba leh politik ia ka riti dustur jong ka Hima

Ka Synjuk ki Khlieh Nongsynshar ka Hima Sohra ki la ther tyngeh ia u nongialam ka Voice of the People Party (VPP) u bah Ardent Miller Basaiawmoit uba la pyniakhleh ia ka kam riti dustur bad ka kam sain hima sima ne ka party politik. Haba kren sha ki lad pathai khubor u Nongaibuit ka Synjuk ki Khlieh Nongsynshar ka Hima Sohra u Paiem Laborious Syiem ula pynrem tyngeh ia u President ka VPP u Bah Ardent Miller Basaiawmoit uba la pynman kum ka jinglehkai politik ia ka jingiakhun ki khun ki hajar ka Hima Sohra ban iada ia ki riti dustur tynrai kyntang pyrshah ia kino kino ki bor kiba thmu ban bujli noh da kumwei pat. “ Ngi pynrem ia ka jingkren u Bah Ardent Basaiawmoit ha ka jingialang paitbah kaba la long ha Mawlai ha ka 7 tarik mynta u bnai. Ula ong “Ngi ngin ym ia khleh jaktung ha ka jingleh politik ha ki surok ne ha kano kano ka jingleh politik kano kano ka seng sain pyrthei kaba phi lah ban khot kyrteng. Ka jingiakhun ka jong ngi, kadei ka jingaiti lut ban pynthikna ba ka jingleh politik kam dei ban ioh rung shapoh ban pynjot ia ki 5 tylli ki sankyrwoh ka sain Dorbar u Khun Khasi kata ka long kaba nyngkong ka Dorbar iing, Dorbar Kur, Dorbar Shnong, Dorbar Raid bad ka Dorbar Hima.”

Ula ong, ba ka Synjuk kan ym shah ban don kano kano ka jingtuklar da kiba nabar ia ka riti bad ia ka jingleh kaba naduh hyndai hynthai bad ki iengskhem ha ka jingiakhun ka jongki ban batskhem bad ban iada ia kitei ki riti tynrai kyntang pyrshah ia kino kino ki bor kiba thmu ban bujli noh da kumwei pat bad lada ki hok ki riti, ki riti ki dustur ki duhnoh ki jingneh ki jingsah ki jong ngi kin sdien ha ka lyer. U Bah Laborius Syiem ula ong, ba ka kynhun kala leit tur sha KHADC ha ka 7 tarik u Jymmang ban pyrshah ia ka jingleh bymhok. jong ka KHADC pyrshah ia ka jingkordor ka tynrai jong ka jingjied ia u Syiem da ka Hima Sohra. “Ngi tur sha District Council ban dawa ba ia kane ka jingleh bym hok dei ban pynbeit noh mardor,” ula ong. U Paiem ula ong ba katba ki dang wad ia ki lad ban pynbeit na ki bor kiba dei khmih, ka long kaei kaei kaba sngewsih bad i saitmet, ba u bah Ardent ula jied ban pynman ia kane kum ka mat jong ka seng ha ka por ba ai jingkren shun ha ka politik ne ‘Political Hate Speech” ha Mawlai.Ula ther tyngeh ia u bah Ardent ba ka jingkthong ka jong u ia ka shuki sain pyrthei, i kumba u kloi ban iuhroit ia ki san kyrwoh ki san kyrdan ka sain dorbar. Ha kajuh kapor, u Paiem Laborius Syiem ula kyntait ia ka jingkynnoh ba ki paidbah kiba la leit tur sha KHADC kidei kiba don jingiadei bad kano kano ka seng sain pyrthei.

“Phi pynman ia ki briew kiba luilui kum ki briew jongka NPP, phi lah pulom ha kaban iohi ia ka jingshisha ba ka jingtehsong ka jongki kamdei na ka politik seng sain pyrthei, hynrei ka jingieid ka jongki ia ka hok ka riti, ka riti ka dustur kaba la phrang ha ki jingtyllun jong ka por kaba la ioh pateng na ki longshuwa manshuwa kaba la pynshong nongrim ha ka jingstad jong uba rim u bastad ki kpa tymmen ki jong ngi” ula ong.Shuh shuh ula bynrap da kaba buh jingkylli ia ka jingtuklar u Bah Basaiawmoit, da kaba ong, “Kila leit sha KHADC ban dawa ia ka sanad ne ka kot pynskhem, ka kamram jong ka District Council kadei ban pyndep. Phi dei u MLA, phim dei u MDC, ka bynta jong phi kadei ha Meghalaya Legislative Assembly. Balei phi wan tuklar hangne?”. Haba kyntait ia kano kano ka jingdonbynta bad ka seng sain pyrthei, u Laborius Syiem ula ong, “Ka long kaei kaei kaba sngewsih ba phi lah kynnoh ia ki paitbah ba luilui ka Hima Sohra kum ki nongkyrshan ka NPP. Ha kajuh ka por phi kynnoh ba nga dei u dkhot ka NPP. Hangne ngan ong da kaba shai kdar iaphi bad ia baroh ba ngam dei kumta”. “Ka jingkitkhlieh jong nga ka long barabor ban ieng pyrshah ia kano kano ka jing shah lehbein bym shong riti bad bym shong nongrim jong uno uno ne kano kano ha kano kano ka rukom. Nga ong ia phi pynbeit noh mar mar ia kane ka jingkynnoh bad kiar raimaw raidieng noh ban kynnoh kumne naduh kane ka khyllipmat, namar lada phim leh ia kane, kynmaw ba “ha ka hok ka shi kyntien, ka jingjler bad ka jingthok kan sa bishar bad kyrtoh kylla ia phi” la pynkut u Bah Laborius Syiem.