Da ka PIL ujor ka AIM bym ioh jingiarap ki paitbah bym don Aadhaar

U Chairman ka Awaken India Movement (AIM), Meghalaya State Chapter u Bah Banshai Marbaniang ula ujor da ka PIL ha ka High Court of Meghalaya pyrshah ïa ka jingpynduh hok ia ki paidbah namar ka jingbym don ia u Aadhaar.

Namar ka jingshem jingeh ki paitbah ha ka jylla Meghalaya, u Bah Banshai Marbaniang, ula shim da ka sienjam, da kaba ujor da ka Public Interest Litigation (PIL) sha ka High Court of Meghalaya ban pan jingiada ia ki hok jong ki nongshong shnong.

La iathuh ba kane ka PIL ka mih na ka jingshem jingeh jong kiba bun ki bynta jong ka jylla, ha kaba ki paitbah kynthup ia ki longïing ba duk, ki tymmen, ki nongtrei bainong sngi, ki samla pule, ki nonghikai, bad ki nongpang, kila shah pynduh ia ki jingioh jingiarap sorkar tang namar bym don ia u Aadhaar.

La pynpaw ba ki paitbah kila shah kyntait ban ioh ia ka hok ka jongki, kaba kytnhup ia ka jingioh bam (Ration) na ka Public Distribution System (PDS), ka jingiarap ban sumar paidbah kum ka MHIS, ka Scholarship, Admission bad jingiarap na ka bynta ki khynnah bad samla pule, ka jingshem jingeh ki Nonghikai Skul, ka jingioh kam bad bai trei kynthup haduh ka MGNREGA bad ban ioh ia ka LPG Gas.

La iathuh ba kine ki jingeh kila ktah jur ia ki paidbah ba bun khamtam haba phai ruh sha ki longïing baduk, ha kaba ki nongtrei sngi ki duh kam bad jingioh bai trei bad ki ASHA bad Anganwadi workers ki shem jingeh ha ka jingioh tulop bad jingiarap lyngba ka Sorkar.

Ha kaba iadei bad ka jingioh jingsumar, ki longkmie ba punkhun bad ki nongpang kiba pang jur ki shah kyntait jingjarap MHIS tang namar bym don Aadhaar, kaba la wanrah ban buh jingma ia ka jingim bad ia ka burom jong ki.

Ha ka pule puthi, ki samla pule ki shah pynduh Scholarship bad Admission bad ki nonghikai ruh ki shem jingeh ha ka jingioh tulop namar ba kim pdiang ia u Aadhaar.

Kawei pat ka bynta kaba pynsngewkhia ka long ba ha kiba bun ki shnong, don ki bor shnong kiba byrngem ia ki paidbah ban pynduh jingiarap lada kim pdiang ban leh Aadhaar. Kane ka jingpynbor ka wanrah ka jingsheptieng bad pynkheiñ ia ka hok bad ka burom jong ki paid nongshong shnong.

Ka AIM kala pynpaw ba katkum ka bynta jongka aiñ, ka Supreme Court jongka Ri India ha ka rai kaba kongsan lyngba u Justice K. S. Puttaswamy (Retd.) vs Union of India (2018 Aadhaar Judgment) kala kren shai ba ym dei ban pyndonkam Aadhaar ha ka rukom kaba pynlong ia ki paitbah ban duh ia ki jingiarap ba dei katkum ka hok jongki. Kumjuh ruh ka Meghalaya High Court badon burom ka la pynpaw ba ka Aadhaar kam dei kaba donkam ha baroh ki bynta bad dei ban pdiang lyngba kiwei kiwei pat ki kot jingithuh khlem da kyntait.

Kane ka jingpynduh hok paidbah ka pynkheiñ ia ki hok ba kongsan hapoh ka Riti Synshar Paidbah (Constitution of India) lada phai katkum ka Article 21 – Ka hok ban im bad burom, Article 14 – Ka hok da jingïaryngkat, Article 19 – Ka hok ban trei bad im da jinglaitluid, Article 21A – Ka hok ban pule puthi.

Lyngba kane ka PIL kala pan lyngba ka ïingbishar ban ai hukum da kaba shai bad ban pynthikna ba ym dei ban don mano mano ba shah pynduh jingiarap bad ban pdiang ruh ia kiwei pat ki kot jingpynithuh lada ym don Aadhaar. Ha kajuh ka por, la kyrpad ia ki paitbah ban wan shakhmat bad ban ai sakhi halor kino kino ki jingshah pynduh hok ne shah pynbor tang namar u Aadhaar, khnang ban pynskhem ia ka jingiakhun paidbah katkum ki bynta ka aiñ.

Kala pynpaw ba ym dei ban pynduh ia ka bam, ka jingsumar halor ka koit ka khiah, ka pule puthi ne ka kam tang namar u Aadhaar bad ia ka hok jong ki paidbah ym dei ban shaniah tang ha kawei ka kot jingpynithuh.